KUCHING: Chairman Kandang Kunsil Padawan (MPP) Lo Khere Chiang ngelalu kerejasama enggau sukung semua rayat ngambika ulih ngangkatka mengeri Kuching nyadi kandang endur pemadu manah endur diau.
Ku iya, ketegal pemisi ti besekat, tanggung pengawa MPP nyendiakka servis ti ulih ngemantup peneka enggau pinta rayat sigi nyadi sebengkah penguji ke seruran ditapi.
“Bemacham servis disedia MPP nyengkaum pengawa ngeluarka lisin, ngaga jalai, parit, lampu jalai, jematan, begunan, ngintu pemaik rampa menua sereta ke bukai.
“Nengah bajet tauka pemisi ke besekat, MPP ngelalu kerejasama enggau sukung semua rayat,” ku iya bejaku lebuh bejadi ‘Instarmac Showroom – The Cube Condominium’ di Jalai Kempas ditu, kemari.
Iya mega meri basa ngagai kompeni pemansang reta ti angkun ngaga lalu nyediakka kondominium ungkup pengelantang rayat kelebih agi ke diau ngelingi kandang endur ke dikuasa MPP.
“Projek ke dipenyadi kitai seharitu dikumbai The Cube. Kompeni deka nyendiakka kondominium nyengkaum perengka bukai tikas dunya ba tanah pemesai 4 ikar.
“Instarmac deka mantu sereta ngemudahka tanggung pengawa MPP bejalaika servis tu kelebih agi ba pengawa ngemantup pinta enggau peneka rayat,’ku iya.
Lo ngarapka semua peranak ke diau dalam kandang endur MPP ngintu manah semua perengka enggau servis ke disedia ngelingi sida lalu nya nyengkaum ngintu pemeresi kandang endur diau sereta parit.
Nengah chara nya kitai ulih ngangkat Kuching nyadi sebengkah mengeri ke tebilang nyerumba ‘Tahun Melawat Malaysia 2014’, tandu iya.
Projek The Cube deka nyendiakka 94 unit kondominium ke alai 3 buah blok begunan peninggi 6 ringkat deka digaga.
Projek disadang tembu dalam taun 2016 lalu sebarang tanya tau dikenatai ngagai lumur 082-577710.