BINTULU: Sekeda peranak menua nya ke deka diambi gawa ba SCORE di Taman Perindustrian Samalaju (SIP) ditu, berasai asa endar ati enggau ulah sebuah kompeni ke nginsil pemutus ngambi sida gawa, enggau nadai madahka kebuah.
Nitihka penerang, semua pengereja pengawa nya udah mujur ba interbiu sereta patut nurun gawa kena 15 Januari tu, taja pia kompeni nya madahka sida enda ngambi orang gawa.
Ku seiku ari orang ke udah mujur ba intebiu nya, Jeffry Banyang, 52, kompeni nya ngasuh iya nurun gawa kena 15 Januari tu, tang opis kompeni nya madahka interviu iya nya enda diakun sida.
“Bala chalun ke diinterbiu sehari nya, kelebih agi ti udah diterima gawa, endang peranak asal menua tu. Taja pia, kami diseliahka ketegal meri awak ngagai pengereja pengawa ari menua luar ngisi pengawa nya, ke patut diisi semua chalun ari menua tu ke udah mujur maya interbiu nya suba,” ku iya.
Aku ukai deka nyalahka sesapa, tang kompeni nya patut ngemeratka pengereja pengawa ari menua tu empu.
Seiku agi orang ti nerima nasit ke sebaka iya nya Merapoh Lau, 57, arapka kompeni nya ulih nerangka enggau silik kebuah enda nyadi ngambi sida gawa taja pan udah mujur maya interviu, sereta dipinta nurun gawa kena 15 Januari tu.
“Enti sema kompeni nya enggai ngambi kami gawa, nama kebuah sida minta kami nurun 15 Januari tu?” ku iya.
Ku iya, bisi mega berita selebubu didinga mansa pending madahka sida iya enda diterima gawa pangku pengawa nya patut diisi pengereja pengawa ari menua luar ke engkeman sereta mayuh agi peneleba gawa.
Merapoh arapka kompeni nya enggau raban bekuasa ke bekaul meri penerang ngagai sida sentang pekara nya ngambika kededua piak sama bela puas ati enggau pekara nya.