KUCHING: Opis Muzium nyadang nerima penatai 1.3 miliun iku temuai ba semua muzium enggau galeri opis nya di serata menua Sarawak taun tu.
Ku Direktor opis nya Ipoi Datan (gambar), tagit sida taun tu bisi mayuh mimit ari taun siti nyin tadi, iya nya semina 1.25 miliun.
“Kami nyadang nerima penatai 1.25 miliun iku temuai taun siti nyin tadi tang nyentuk ke ujung taun, kami semina nerima 1.06 miliun iku temuai aja.
“Penyampau nya kusut dipelabaka ketegal sekeda muzium enggau galari kami ditutup laban ti dikemanah, baka Fort Margherita,” ku iya madah ngagai The Borneo Post ba sebengkah interviu eksklusif ensanus.
Ku Ipoi, sekeda atur pengawa udah dirintaika ungkup taun tu.
“Beserimbai enggau Taun Nemuai Ke Malaysia 2014, kami udah ngerintaika sekeda atur pengawa, ti tebal agi bekaul enggau pemandang nyengkaum sebengkah atur pengawa ke dikumbai “Cultured Rainforest”, ti deka diatur ba Miri kena bulan Julai taun tu. Pemandang nya deka mantaika arkeologi ke ditemu ba tanah tinggi Kelabit.
“Kena nambahka nya, utai ke udah dipandangka kami di Kuching deka kami pandangka ba sekeda pasar enggau bandaraya bukai di serata menua tu.
“Kami mega deka ngemajakka tampung randau sentang pesaka menua. Diatu kami benung ngiga tukang licha ke ngembuan pengelandik ba mayuh bengkah topik ti tau ngerinduka ati mensia mayuh,” ku iya.
Seiti ari pemandang ke udah diperambu ungkup taun tu nyengkaum “Makanan Termahal Dunia”, “Khemah” enggau “Tasbih”.
Opis nya mega benung ngemanahka gaya tikas utai ke dipandangka ba Muzium Sarawak diatu nyengkaum sekeda muzium bukai diserata menua tu, ku Ipoi.
“Berengkah ari 15 Januari, kami deka nutup Muzium Pelilih Limbang ngambika bisi awak endur ngemanahka tikas utai ke dipandang. Muzium nya dipelaba deka dibuka baru ujung bulan Februari.
“Pengawa ngemanahka Fort Alice diSri Aman benung dipejalaika sereta disadang tembu digaga ujung taun tu.
“Kelimpah ari pengawa ngemanahka sekeda muzium enggau galeri, kami deka muka sebuah Muzium Pesaka Tuai di Sri Aman, ti nyadi pematak pengerindu ke baru ba bagi menua nya,” ku iya seraya madahka Opis nya deka majak begempung enggau sekeda ijinsi perintah, kena nambahka penyampau penatai bala temuai taun tu.