KUCHING: Presiden Sarawak Workers Party (SWP) Larry Sng nyadang diri deka bediri ba sitak Pelagus maya Pengawa Bepilih Nengeri Ke-11 ke deka datai.
Nyaut tanya pemberita pengudah pengawa bejadi SWP pampang Padungan malam ensanus, iya madah kediri enda nyangkal tuduh ti nyebut iya deka bediri nganti ADUN Pelagus ke mega kaban parti George Lagong.
“Aku enda belalaika pengawa aku ti udah bejalai ba kandang menua Pelagus ngelamatu lalu aku ngasaika ke diri sigi ungkup peranak menua tu.
“Maya pengawa bepilih nengeri ke udah, kimpin ke dipejalai raban penyukung SWP nyebut tauka ngangkatka rambai jaku ‘tanka menua tu ungkup aku (Larry)’.
“Taja pan aku enda bediri sereta menang nengah tikit nya, tang ketegal YB George menang…pemujur iya mega ngelaika pemujur aku. Taja pan aku ukai YB, aku andal meri servis ngagai peranak Pelagus ketegal aku rinduka sida lalu pia mega sida rindu mega ke aku,” ku iya.
Iya ke kala mangku pengawa nyadi Menteri Muda Orang Nembiak netapka kuing parti SWP udah diubah pengudah pengawa bepilih parlimen dalam taun 2013 ke alai parti diatu deka ngadu kerejasama enggau penyakal, Pakatan Rakyat.
“Kitai udah netapka enggau terang dia parti deka ngadu kerejasama enggau parti bukai. Diatu parti udah milih Pakatan Rakyat dalam pengawa bekerejasama nya.
“Kebuah kitai milih Pakatan Rakyat ketegal ba pekara politik diatu, sistem dua parti ke dikena pakatan sigi sebengkah polisi ti diungkup ngagai rayat kelebih agi ba maya rega barang majak niki enggau hak kitai ba pekara agama disekat,” ku iya.
Rayat patut bisi sebengkah alur endur ngenataika pinta enggau kedeka sida lalu aku pechaya SWP ulih mangku pengawa nya, tandu iya.
Larry ti kala nyadi ADUN Pelagus ngarika Parti Rakyat Sarawak (PRS) ditingkilka ari parti ba taun 2008 ketegal penyarut ke nyadi dalam parti maya nya lalu nya mega ngujungka iya enda disabung bediri ngenanka penuduk nya ba Pengawa Bepilih Nengeri ke-10 (2011).
Ba taun pengawa bepilih taun 2011, chalun baru PRS Stanley Nyitar alah ngelaban chalun SWP George Lagong.