Anda di sini

Raban Nembiak PRS minta Bup Kudus ditikalka pulai baru

Advertisement

KUCHING: Sayap Raban Nembiak Parti Rayat Sarawak (PRS) ngansak Opis Pengarap Islam Selangor (JAIS) mulaika baru 320 Bup Kudus dalam jaku Melayu enggau jaku Iban ke dirampas minggu nyin tadi ngagai Gerempung Bup Kudus Malaysia (BSM) laban nya ungkup bejaku Melayu Keristin ari Sarawak enggau Sabah.

Dalam penerang ke dikeluarka ditu, ensana Raban Nembiak PRS madah, udah datai maya rayat Malaysia sedar iya nya menua tu kelebih agi Menteri Besai Datuk Seri Najib Tun Razak ke udah meri kelala ulah bebasaka pangan diri ngagai dunya.

“Nya alai, kami minta Bup Kudus ke dirampas ditikalka pulai baru ngagai mensia mayuh laban sida semina deka besembiang dalam jaku Melayu- Keristin ari Sarawak enggau Sabah.

“Nya mega mai reti ngagai orang Keristin ke gawa ba Semenanjung kelebih agi ba genturung menua Lembah Klang,” ku padah penerang nya, bedau lama ke udah.

Tandu penerang nya, Bup Kudus ke dirampas nya tau bendar mai peragam ke salah ngagai sida ke ukai bepengarap Keristin laban nya endang udah nyata bisi dichelak ba pengujung lambar nya semina ungkup keguna orang Keristin kelimpah dikelai enggau tanda regang.

Berebak enggau nya mega, Raban Nembiak PRS madah; “Semua orang patut bebasaka pemutus ke digaga Kot Apil (CoA) bekaul enggau isu bekenaka leka jaku ‘Allah’ dalam buletin The Herald ke dikeluarka ninting minggu seraya nganti apil ba Kot Besai.

“Tang isu kediatu iya nya nama kebuah JAIS ngerampas 320 Bup Kudus dalam jaku Melayu enggau Iban deh?.

“Pengawa JAIS ba baruh Seksyen 9 (1) enggau (2) Bukan Agama Islam (Kawalan Penyebaran Di Antara Umat Islam) endang enda nitihka undang-undang sereta ngelanggar Pekara 11 Pelembagaan Persekutuan,” ku penerang nya.

Raban Nembiak PRS mega enda besetuju enggau jaku tangkan ti madahka barang sapa ke enda besetuju enggau pengawa JAIS nya sebaka enggau enda nerima pemutus Kot Apil.

Raban Nembiak PRS mega enda lantang ati enggau atur ‘double standard’ olih piak ke bekuasa nasat Father Lawrence ba baruh Akta Hasutan laban mayuh agi  penerang bebau asut dikeluarka NGO bukai bekaul enggau isu ‘Allah’ di menua tu.

“Isu ke besai diatu iya nya perintah besai patut mutarka dua bansa polisi bekaul enggau leka jaku ‘Allah’.

“Sekumbang ditumbuhka, kitai sama nemu Sempekat 10 Pekara ke disetujuka perintah semina mutarka sekeda ari penanggul nya. Tu nyemetak amat, perintah besai patut masuk champur lalu mutarka isu tu ungkup semua,” ku penerang nya.

Raban Nembiak PRS mega ngansak perintah besai enggau Menteri Besai masuk champur mutarka isu ‘Allah’ tu enggau jampat.

Advertisement