Anda di sini

Orang Wong enda setuju iya ditingkil

Advertisement

\KUCHING: Pemutus ningkilka chairman Parti Sa’ati Rayat Sarawak (SUPP) pampang Sibu Dato Sri Wong Soon Koh  enda diterima raban ketuai dalam parti ti bepiakka Wong.

Chairman SUPP Bengoh Datuk Dr Jerip Susil madah pemutus ti diletakka Komiti Kereja Pusat (CWC) kenaka malam 7 Januari enda sah ketegal Opis Pengerijister Gerempung (ROS) benung bejalaika pansik ba maya pengawa bepilih dalam parti nyerumba Aum Deligit Tiga Taun Sekali (TDC) 2011 suba.

“Enti amat Wong Soon Koh ditingkilka ari parti, kami enda nerima pemutus nya ketegal ROS mengkang bejalaika pansik ba tuduh bisi pengawa ngelanggar atur bepilih maya TDC 2011 suba.

“Ditambah agi enggau pemutus ROS ti udah nginsil pengerijister pampang Bekenu enggau Piasau munyika diriput ba surat berita 10 Januari (kemari).

“Enti pampang Bekenu dikinsil, reti nya Peter Chin enda sah nyadi chairman pampang nya lalu enda patut dipilih nyadi presiden parti ketegal ti mai penuduk ke enda sah,”ku iya lebuh dikerandau kemari.

Lalu pia mega enggau penuduk Datuk Sebastian Ting ke nyadi chairman pampang Piasau sereta kaban CWC, tandu iya.

Sekretari Besai SUPP Dr Sim Kui Hian ngesah nerima surat ari ROS ti nginsil pengerijister pampang Bekenu enggau Piasau sereta surat tunjuk kebuah (Show Cause letter), kebuah parti (SUPP) enda patut dikinsil ROS kenaka pagi 9 Januari.

Penerang ari Direktor ROS Sarawak Ken Leben madahka ketetiga surat nya udah dianjung indu opis ROS di Kuala Lumpur nengah ‘post’ sereta faks kenaka 7 Januari.

“Aku mega udah dipinta ketuai indu Opis ROS di Kuala Lumpur nyuaka salin ketetiga surat nya ngagai Dr Sim ke alai surat nya udah disuaka aku ngagai iya (Dr Sim) kenaka 9 Januari ba indu Opis SUPP.

“Sekali sida (SUPP) nerima salin asal ke dianjung nengah post tauka faks kenaka 7 Januari, aku enda nemu tang iya ke amat aku udah nyuaka salin surat ngagai Dr Sim kenaka 9 Januari,” ku Ken lebuh dikerandau.

Parti (SUPP) mega diberi timpuh 30 hari berengkah ari 6 Januari ngagai 6 Februari 2014 nyaut surat tunjuk kebuah lalu betanyaka kebuah parti enda patut dikinsil, tandu Ken.

Nyaut tanya sekalika aum ti diadu CWC ba malam 7 Januari ti netapka pemutus ningkilka Wong sah tauka enda, Ken enggai bejurai pekara enggau panjai.

Ba kaul ke sama, Jerip madah hari ke endar sida nerima surat ari ROS baikka nya 7 tauka 9 Januari ukai pekara ti tau nentuka pemutus CWC.

Ku iya, ari pun agi sida seraban ti bepiakka Wong sigi enda ngakun sebarang pemutus CWC ketegal ROS mengkang bejalaika pansik.

Wong diberitaka lalu bedau nerima surat tingkil ari parti ari CWC.

Jerip madahka Peter Chin patut ngesan semua penusah ke nuntung parti maya ke diatu ke alai iya enda kala mendingka jaku ari raban ti bepiakka Wong ti bebendar ngiga jalai mutarka penusah ke nyadi dalam parti.

“Pekara ke nyadi balat ngenyinu kitai semua. Pekara tu enda nyadi enti Peter Chin sanggup berandau enggau raban kami ungkup pemaik dalam parti,”ku iya.

Advertisement