CHERITA JALAI PENGIDUP: “Traversing Jungle Tracks: My Autobiographical Sketch” ke dikarang Dr Robert Menua Saleh.
SIBU: Direktor Pekara Pemansik Tun Jugah Foundation (TJF) Dr Robert Menua Saleh udah mujur ngeluarka bup ke digelar “Traversing Jungle Tracks: My Autobiographical Sketch”.
Maya dikerandau pengarang berita empai lama tu tadi, iya madah bup nya nyeritaka jalai pengidup iya empu ke endang Iban chulin ari menua pesisir ngiga pengidup ke meruan agi ari pemujur ba pelajar.
Iya madah, batang tuju bup nya ditengkebang endang deka bekunsi enggau bala mayuh ke bebendar deka ngubah pengidup diri taja pan napi macham leman penguji.
“Aku semampai ngasaika penusah enggau pengemar pejalai pengidup aku baka ke neresa kampung alai jelu bisa mayuh belalai sereta suah nyubuk.
“Aku ngarapka cherita dalam bup tu tau nyadika malin nembiak rebak baru beratika penusah ke ditapi apai indai sida dulu suba ketegal deka nyengulaka anak nyentukka mujur ba pelajar,” ku iya.
Dr Robert madahka iya bulih buah penemu nengkebang 180 lambar penebal bup nya bepun ari penemu ari Profesor Emeritus Dr Vinson Sutlive maya iya agi ba luar nengeri bejalaika pengawa mansik ari Tun Jugah Foundation ngelama tu.
“Dr Sutlive meri aku pengeransing enggau jaku lalau maya iya terubah nemu aku deka nulis sebengkah bup motivasi bepelasar jalai cherita pengidup aku empu,” ku iya madahka baru.
Dr Robert kala nyadi sekretari politik kepala menteri, ada taun 1950-an ba Lubok Tanjong, Ulu Sungai Ngemah ba pelilih Kanowit.
Keterubah, iya besekula ba Nanga Lakah Local Authority School ba taun 1961 nyentukka Primari Empat sebedau nampung pelajar ngagai Primeri Lima enggau Enam ba SK Nanga Jagau.
Udah nya iya besekula ba Sekolah Menengah Kapit (1967-1969) lalu nampung pelajar ngagai Sekolah Tinggi Datuk Patinggi Abdul Rahman Yaakup (Sedaya) di Kanowit.
Ari Sedaya, iya dipilih nampung pelajar ngagai Tanjong Lobang College di Miri lalu ditangkan ba Institut Teknologi MARA (ITM) di Shah Alam, Selangor.
Iya ngembuan master degree ari Leicester University, England (1994) sereta bulih PhD ari Universiti Malaysia Sarawak (UNIMASA) ba taun 2008.
Penerang silik senentang bup tu tau ditanya ngagai Dr Robert nengah lumur 012-8861133.