KUCHING: Balai Dagang enggau Industri Dayak (DCCI) udah merambu ngagai Komiti Pemansang 1Malaysia (1MDB) ngaga sebengkah program pengawa dagang ungkup raban bansa Dayak enggau bala kontrektor Kelas F.
Sapit Presiden, Tan Sri Celestine Ujang madah, pemandai, pengelandik ngurus enggau ngangkatka tikas penatai pemisi orang dagang Dayak patut disungkakka nengah program latih bepengelandik.
“Tanggungpengawa 1MDB ba baruh sempekat tu dikena mantu mayar ungkus latih ngagai bala pesereta ke diambi ari komuniti dagang Dayak,” ku iya lebuh nemuai ngagai Opis Kaunsil Penyanding Penemu Pemansang 1Malaysia Sarawak (1MSAC) ditu, apin lama ke udah.
Tuju penemuai nya kena masa chairman 1MSAC Datuk Joseph Salang Gandum seraya meri licha bekaul enggau juluk sereta tuju sesebengkah organisasyen baka 1MDB enggau Yayasan Rakyat 1Malaysia (YR1M).
Kena nimbal bekaul enggau perambu DCCI nya, 1MSAC madah nya sebengkah perambu ke mai mayuh penguntung kena bekunsika peneleba enggau DCCI.
Kaban Kaunsil 1MSAC ke beempu tanggungpengawa ngatur program, Irwan Zulkarnain Hasbie, ngelaluka penyereta kaban DCCI ba ‘Program Latihan Usahawan’ ke deka diatur ba Kuching pun bulan nyin ila.
Ujang ngarika piak DCCI madah DCCI deka nganjung pesereta ngulu bengkel nya.
Raban DCCI mega diberi licha ari Direktor Projek YR1M Dennis See bekaul enggau bansa projek ke udah mujur dipejalai ba Sarawak sekumbang udah ditumbuhka ba bulan Julai 2013.
Bagi 1MDB, sida nerang bekaul enggau tuju besai kaunsil ti bejalaika projek-projek ke dipelanja ba baruh program Tanggungpengawa Sosial Korporat (CSR) ari kompeni ke bebesai ti mungkur mensia mayuh, ngerembaika atur pemansang enggau ngangkatka kualiti pengidup rayat.
SUPP dibalut penyarut dalam parti pengudah bisi dua raban dalam parti ti betuaika Chin enggau Wong.
Penyarut majak bebalut maya Aum Deligit Tiga Taun Sekali (TDC) ke diatur ba bulan Disember 2011. Raban Wong enda datai ngulu aum nya ketegal pechaya bisi pengawa ti ngelanggar atur ba pengawa bepilih renggat pampang nyerumba TDC.
Ba TDC nya, Chin dipilih nyadi presiden parti nganti Datuk Patinggi Tan Sri Dr George Chan ti ngambi pemutus pinchin ari politik pengudah alah ba pengawa bepilih nengeri dalam taun 2011.