KUCHING: Chairman Parti Sa’ati Rayat Sarawak (SUPP) pampang Simanggang Datuk Francis Harden Hollis pechaya udah kelalu laun deka nyelamat parti nya pengudah Opis Pengerijister Gerempung (ROS) ngeluarka Surat Tunjuk Kebuah minta nama kebuah parti nya enda patut dikinsil.
Ku iya, komiti kereja pusat (CWC) maya ke diatu enda bebendar deka nyelamat parti lalu enda ngipakka jaku ti madah dekaka parti angkat tegap.
‘Pengudah semua pekara tu nyadi, sida nunjukka jari ngagai kami seraban ti miakka Dato Sri Wong Soon Koh ke nyadika kebuah SUPP dibalut penyarut.
“Diatu udah laun, kami seraban ke nyengkaum enam iku YB sereta empat iku sekretari politik ti betuaika Dato Sri Wong Soon Koh bela sepenemu,’ku iya nengah pesan jaku pandak (SMS) kemari.
Iya ke mega Menteri Muda Pengawa Berumah sereta Menteri Muda Pemansang Menua Pesisir netapka sida seraban sigi enda ngakun CWC tauka sebarang pemutus ke digaga CWC.
“Kitai enda ngakun raban ke dipilih ngarika CWC sereta mega sebarang pemutus ke digaga CWC ngelamatu lalu nya nyengkaum pemutus ningkilka Wong ari parti ti diputus kenaka 7 Januari tu tadi,’ku iya.
Entara ketuai bukai ti bepiakka Wong iya nya Datuk Lee kim Shin, Datuk Dr Jerip Susil, Dr Johnicol Rayong, Ranum Mina, Andrew Shilling, Suzanne Lee, Ku Fut Po enggau Phang Dah Nan.
SUPP dibalut penyarut dalam parti pengudah bisi dua raban dalam parti ti betuaika Chin enggau Wong.
Penyarut majak bebalut maya Aum Deligit Tiga Taun Sekali (TDC) ke diatur ba bulan Disember 2011. Raban Wong enda datai ngulu aum nya ketegal pechaya bisi pengawa ti ngelanggar atur ba pengawa bepilih renggat pampang nyerumba TDC.
Ba TDC nya, Chin dipilih nyadi presiden parti nganti Datuk Patinggi Tan Sri Dr George Chan ti ngambi pemutus pinchin ari politik pengudah alah ba pengawa bepilih nengeri dalam taun 2011.