KUCHING: Rayat bepengarap Islam di Semenanjung Malaysia patut belajar ari bakih sida di Sarawak bakani ke chara bebasaka pengarap bansa bukai, ku Presiden Parti Rayat Sarawak (PRS) Tan Sri Datuk Amar Dr James Masing (gambar).
Iya madah, orang Melayu di Sarawak nadai ngembuan salah sangka bekaul enggau isu ‘Allah’ ditu laban mayuh agi sida nemu reti kebuah pengarap bukai nguna leka jaku nya ti nyebut nama Tuhan dalam sembiang sida.
“Di Sarawak mega bala ketuai tinggi kami nyengkaum Kepala Menteri Pehin Sri Abdul Taib Mahmud udah madah, nadai nyadi isu besai bekaul enggau leka jaku ‘Allah’ kelebih agi maya bejaku Melayu enggau Iban Keristin.
“Ketuai bukai baka Menteri Muda Pekara Islam Datuk Daud Abdul Rahman enggau Menteri Muda Pemansang Nembiak Datuk Abdul Karim Rahman Hamzah mega meri jamin ngagai peranak bepengarap Keristin ditu iya nya nadai nyadi isu besai ba sida enti deka bekenaka leka jaku nya ba sembiang pengarap Keristin,” ku Masing madah ngagai The Borneo Post ditu, bedau lama ke udah.
Masing mega madah, nya nunjukka ulah bebasaka pangan diri chukup tinggi di Sarawak ke diulih sida ba pelajar tumu ba sekula misyen.
“Naka ke ditemu aku, nembiak bepengarap Islam ke kala belajar ba sekula misyen di nengeri tu mengkang ngemeranka chara enggau semengat Islam taja pan sida belajar ba sekula misyen.
“Siti pekara bekaul enggau sekula misyen tu iya nya sida nadai kala ngansak nembiak bepengarap Islam megai pengarap Keristin tang sida ngemeratka penyulut dalam pelajar, ngemeratka pemanah ulah ba semua raban nembiak enda ngira bansa enggau pengarap,” ku Masing ke kala belajar ba SMB Methodist Sibu ari Pom Satu nyentuk ngagai Pom Enam sebedau nampung pelajar ngagai menua tasik ngambi PhD.
Bekaul enggau isu ‘Allah’, Masing andal pemutus Kot Besai kena 24 Februari tu deka ngenukukan rayat ari mayuh jalai pengarap di menua tu majak idup lantang enggau likun.
“Aku andal bekaul enggau pekara tu pengudah dipadahka raban ketuai Keristin ke datai nemuai ngagai rumah aku sepenembu ngulu Aum Besai Gerija Malaysia (CCM) ke diatur ditu kena Hari Tiga tu tadi,” ku iya ke mega nyadi Menteri Pemansang Tanah.
Bekenangka tanya Menteri Besai ke suba Tun Dr Mahathir Mohamad pematut bansa Iban ngena leka jaku ‘Allah’ kena nyebut nama Tuhan maya sembiang ba Semenanjung Malaysia.
Masing madah, bansa Iban tau ngena leka jaku ‘Allah’ nya laban sida bisi hak sereta nitihka undang-undang dalam Perlembagaan Persekutuan.
“Baka bala bansa Iban ari Sarawak ke mindah ngagai menua bukai, sida disempulang adat enggau pengarap sida empu. Nya alai, maya sida mindah ngagai menua Semenanjung Malaysia sida mega mai adat enggau pengarap sida empu ba Semenanjung Malaysia mega, nuan enda ulih nagang adat enggau pengarap ke dikemeranka sida enda ngira dini endur,” ku Masing ke mega ADUN Baleh.
Iya nimbal riput berita bekaul enggau tanya Mahathir relevan tauka pematut bansa Iban ngena leka jaku ‘Allah’ ba Semenanjung Malaysia maya besembiang.
Masing madah, nya sebengkah ari chara sesiti pengarap ngereja sembiang sida nyengkaum pengarap Islam ba dunya tu.
“Dalam pekara tu, bansa Iban enda deka ngereja pengawa salah tang ngereja pengawa (sembiang) nitihka ajar pengarap,” ku iya.
Antara pengari CCM ke bisi nemuai ngagai rumah Masing iya nya Ketuai Gerija Anglican di Asia Timur Selatan Archbishop Datuk Billy Lapok, Ketuai Sekretari CCM Rev Dr Herman Shastri, Bishop Datuk Ng Moon Hiing ari Semenanjung, Bishop Datuk Thomas Tsen ari Gerija Keristin Basel di Malaysia, Bishop Dr Ong Hwai Teik Gerija Methodist Malaysia, Bishop Aaron Yap Gerija Luteran Malaysia, Mejar Lee ari Salvation Army Malaysia, Elder Mok Chen Lian ari Gerija Presbyterian Malaysia, Presiden Lensy Mojiun Gerija Protestan
Sabah, Presiden Steward Damat ari Gerija Methodist Iban Sarawak enggau Elder Ambrose Linang, ke mega Sekretari Besai Gerempung Gerija-gerija Sarawak.
Mega bisi datai iya nya Kaban Parlimen Hulu Rajang Wilson Ugak Kumbong enggau Sekretari Politik Kepala Menteri Wilson Nyabong Ijang.