MARUDI: Kaban Parlimen Baram, Anyi Ngau minta sesapa ke patut nerima tauka ngembuan penatai pemisi baruh ari RM4,000 sebulan, ngisi pom minta BRIM 3 ungkup taun 2014 laban timpuh pengabis nganjung pom udah ditetapka kena 31 Januari tu.
Ku Anyi, orang ke ari Long Lama sereta diau ba kandang menua nya tau ngisi pom ba Sab- Pelilih Mit Long Lama, orang ke ba Beluru Bakong tau ngisi pom ba Sab- Pelilih Mit Beluru lalu orang ke ba Marudi tau ngisi pom sida ba Opis Pelilih Mit Marudi. Sesapa ke enda ulih ngisi pom ba tiga bengkah endur nya, tau ngisi pom sida nengah chara online.
Anyi bejaku munyi tu ba aum pengarang berita ke diatur ba Palan Servis Kaban Parlimen Baram, di Bangunan Mayland lemai kemari.
Kelimpah ari nya, sesapa ke agi bujang sereta beumur 21 taun ke baruh sereta ngembuan penatai pemisi baruh ari RM2,000 sebulan, mega diperansang nganjung penatai sida.
Anyi mega minta orang ke kala nerima BRIM 2 ke ngembuan penatai pemisi baruh ari RM3,000 sebulan taun siti nyin tadi, tau ngubah baru penerang sida sereta meri lumur akaun sida ngagai raban opis ke ngatur pekara nya.
Taun siti nyin tadi, penyampau mensia mayuh ke nerima BRIM 2 ba Long Lama bisi 8,920 iku, ba Sab- Pelilih Mit Beluru bisi 4,729 iku lalu ba Pelilih Mit Marudi disadang bisi nambah, ku Anyi.