KUCHING: Tumu pagi seharitu, ujan di Sarawak dipelabaka deka nyadi ba menua tebing tasik di bagi menua Mukah, Bintulu enggau Miri.
Pekara nya bepelasarka penerang ti dikeluarka Opis Pengemata Gaya Hari Malaysia Pampang Sarawak pukul 3.35 lemai kemari, 9 Januari.
Bepelasarka penerang nya mega, ba timpuh tujuh hari ti deka datai, gaya hari nengeri Sarawak dipelaba agi mambam di mayuh bagi menua lebih agi di kandang menua pesisir sereta tebing ai.
Kelimpah ari nya, nitihka statistik penusah bah ti dikeluarka nengah opis penerang kemari (9 Jan) naka pukul 4 lemai ngeriputka semina sebuah aja palan pengenduh sementara agi dibuka iya nya Dewan Mensia Mayuh Beluru, Bakong.
Penyampau orang ti dipindah ngagai Dewan Mensia Mayuh Beluru, Bakong iya nya bisi 52 iku orang ti mungkur 12 ruang bilik ari Kawasan Setinggan, Bakong.
Nambahka nya, bepelasarka penerang ti sama kemari nengeri tu ngerikutka sepenyampau 2,702 iku orang ti mungkur 664 ruang bilik agi tejanggal ketegal penusah tasah bah naka pukul 4 lemai.
Tebal agi orang ti mengkang tejanggal ketegal penusah bah iya nya di bagi menua Miri ke bisi 2,270 iku orang ti mungkur 528 ruang bilik.
Di bagi menua Betong bisi 127 iku orang ri mungkur 22 ruang bilik ari Rh Tutty Tanjung Batu Meludam.
Di Bintulu bisi 30 ruang bilik ari Rh Ado, Sungai Kakus mengkang tejanggal ti udah bepindah ngagai rumah kaban belayan ke diau ba kandang endur ke tinggi.
Lalu di bagi menua Sibu iya nya bisi 305 iku orang ari 84 ruang bilik ti nyengkaum Kampung Bahagia Jaya, Teku bisi tujuh iku ari sebuah ruang bilik; Sg Menyan (119 iku orang ti mungkur 37 ruang bilik); Salim Stabau (152 iku orang ti mungkur 25 ruang bilik); semilan iku orang ti mungkur dua ruang bilik ari Lot 238, Lorong 4, Jalai Sentosa Salim enggau 18 iku orang ti mungkur tiga ruang bilik.