KUCHING: Tiga pampang mit Parti Sa’ati Rayat Sarawak (SUPP) Senah, Teng Bukap enggau Beratok minta Komiti Kereja Pusat (CWC) matak pemutus ningkilka Dato Sri Wong Soon Koh ari parti.
Kelimpah Wong, Presiden SUPP Tan Sri Peter Chin enggau Sekretari Besai Dr Sim Kui Hian mega dipinta matak pemutus ke diletak ba empat iku raban bukai ti disetuju kena 7 Januari tu tadi.
Tiga pampang mit ti ngarika SUPP Tarat enda arapka pemutus nya tau digaga pengudah tuduh ti madah pampang Bekenu enggau Piasau udah dikinsil pengerijista ba Opis Pengerijista Gerempung (ROS) munyika berita ti pansut ba surat kabar kemari.
Bekenu ti betuaika (Chairman) Chin, sereta Piasau betuaika Sebastian Ting. Kededua pampang nerima surat dikinsil pengerijista pengudah pejalai aum besai pampang enda nitihka atur gerempung ba taun 2011.
“Enti proses bepilih ba pampang Bekenu enda dipejalai nitihka patut, retinya Tan Sri Peter Chin nadai kuasa agi nyadi presiden ke dipilih ketegal status iya nyadi deligit maya TDC enda diterima,”ku ketetiga pampang nya nengah penerang berita kemari.
Ketegal nya, sida sepenemu pemutus ningkilka Wong sereta empat iku ke bukai kena Hari Dua tu tadi enda sah.
Tandu sida, enti Aum Deligit Tiga Taun Sekali (TDC) diadu taun tu, aum nya patut dipejalai enggau lurus sereta adil lalu atur enggau jurai pengawa bepilih patut dikerandau begulai engau raban ari sepiak Wong.
“Kitai dipadah senentang manipulasyen ba atur bejalaika pengawa bepilih parti ba taun 2011, kitai ngansak raban ketuai SUPP nerangka isi surat ROS ngagai indu opis SUPP kena 7 Januari,”ku penerang nya.