KUCHING: Kedai makai tau diperintah tutup tekala nya enti tai chit enggau gerinang bisi ditemu ayan ba kandang endur ngelingi kedai kelebih agi besemak enggau pemakai.
Pemesai Opis Pengerai Pelilih Kuching, Dr Kamaruddin Lajim madah, opis iya deka bejalaika operasyen meresa kedai makai dalam taun 2014 tu lalu enti ditemu ngelanggar atur pemeresi, kedai tauka orang ngempu kedai deka diukum.
Ku iya, nitihka jaku gerah ke baru dipansutka Opis Menteri Pengerai Malaysia, enti pansik ke dipejalai raban ari opis pengerai bisi tetemu tai chit enggau gerinang ngelingi pemakai ke deka dijual baik nya udah mansau tauka agi mata, kedai nya tau diperintah tutup.
“Tajapan kedai makai ngembuan tikas pemeresi ngelui ari 50 persin nitihka penetap ke diberi opis pengerai, perintah nutup kedai tetap deka dikeluar enti pansik bisi tetemuka tai chit enggau gerinang.
“Atur tu ditetap kena nentuka sakit kemi chit sereta penyakit bukai enda ngelekai lebih agi ba mengeri Kuching,” ku iya ba sebengkah aum pengarang berita nyerumba “Ops Premis Bersih’ ditu, kemari.
Nengah operasyen nya, Kamaruddin madah, ukum nengah Akta Makanan 1983 (Peraturan Kebersihan Makanan 2009) tau diletak ngagai orang ngempu kedai ke ditemu salah.
Iya mega madah, operasyen nya dipun kena 1 Januari tu tadi lalu deka dipejalai nengah kerejasama opis Kaunsil, MBKS ba sepemanjai taun ke alai iya nyadang lebih 1,000 kedai makai ke udah direjister ngelingi Kuching deka diperesa.
“Semua kedai makai ngelingi mengeri Kuching nyengkaum gudang ngeluarka utai pakai, pasar malam, pasar tani sereta kedai renchit ditangkan ngemeratka pemeresi pemakai ke dijual.
“Tebal agi kedai ke udah diukum ketegal enda ngintu pemeresi kedai sida enggau manah kelebih agi dapur ke balat kamah,’ ku iya.
Ba operasyen ke dipejalai ba sekeda kedai makai di King Centre kemari, sebuah kedai makai udah diperintah tutup 14 hari pengudah tai chit bisi ditemu ba dapur.
Timpuh 14 hari diberi ngagai kedai makai meresi kedai lalu enti diperesa mengkang kamah, kedai nya deka ditutup terus.
Sebuah agi kedai diukum RM1,000 ketegal ti ngelanggar tikas pemersi ke ditetap.
Dua tiga hari ke udah, sebuah kedai makai di Kota Sentosa ti suah endur orang mayuh ngirup udah mega diperintah tutup.
Maya diperesa, raban kami bisi tetemuka tai chit ba mayuh kandang endur dalam kedai nya lalu sekeda nya ditemu besemak enggau pemakai di dapur, tandu iya.