BINTANGOR: Kaban Parti Rayat Sarawak (PRS) patut berani napi sebarang penanggul ngambika parti semampai tegap sereta relevan.
Kaban Kunsil Nengeri (ADUN) Ngemah Alexander Vincent mantaika jaku lalau tu maya bejadika Pati PRS Sungai Selidap ba Rumah Rejina, bedau lama ke udah.
“Tetiap kaban parti enda ngira tuai, biak tauka orang indu patut berani napi sebarang penanggul ke nuntung parti kelimpah bejalaika pengawa ke rayat nengah semengat Barisan Nasional (BN),” ku iya.
“Orang indu mega patut bagas agi gawa dalam politik dikena mantu perintah ngemansangka menua, kelimpah bala nembiak lebih proaktif nyungkakka pengelandik diri dikena nyaup pinta perintah ba atur pemansang ti ngemeranka industri berat,” ku tandu iya.
Vincent ke mega Kaban Komiti Besai PRS ngelalau semua kaban parti semampai begempung enggau pangan diri kelimpah ngerapatka kaul enggau kaban kompenen parti Barisan Nasional (BN) ke bukai enda ngira bansa enggau jalai pengarap.
Dalam BN, semina siti aja tuju kitai iya nya deka menang semua penuduk dalam tetiap pengawa bepilih bisi diatur,” ku iya seraya madahka tanggungpengawa majak berat berindik ari atur pengawa dipejalaika penyakal dipeda majak aktif.
Beduduk enggau nya, siti tuju kitai numbuhka pati parti ba ditu enggau ba bagi menua Meradong dikena mantu BN ngerampas penuduk Parlimen Sarikei enggau DUN Meradong ari penyakal, ku iya.
Urung 300 iku kaban parti enggau penyukung nyempulang chairman pati Dahlan Julaihi, Chairman PRS Meradong Senaun Jaya enggau Kaban Komiti Indu Priscilla Allen ngulu pengerami nya.