Anda di sini

DBKU udah nengkira napi VMY 2014: Abg Wahap

KUCHING: Beserimbai eng­gau Taun Nemuai Ke Malay­sia (VMY) 2014, Opis Kaunsil Bandaraya Kuching Utara udah ngerintaika mayuh program pengerami.

Datuk Bandar DBKU, Datuk Abang Abdul Wahap Abang Julai madah, pengawa ngemunka semua program tu ila deka dipejadika Kepala Menteri Pehin Sri Abdul Taib Mahmud kena 24 Januari lalu program tauka pengerami nya deka belabuh ari 24 nyentuk 26 Januari di Esplanade Kuching.

Kena ngerami pengawa nya mega, atur pengawa bukai baka pengawa pemandang, bejualka pemakai, lumba eng­gau main, pemerindang sereta mantaika penemu sama bela deka diatur.

“Mayuh program deka dibantaika DBKU taun tu, lebih agi nyambut pengerami VMY 2014, lalu kami di DBKU mega entara ejensi Perintah ke sama deka nge­laluka temuai ari menua tasik meda pemanah menua kitai ditu,” ku iya seraya nambah, Kepala Menteri Pehin Sri Abdul Taib Mahmud deka bejadika program nya.

Entara atur pengawa ke udah dirintai DBKU ke taun 2014 tu iya nya, pengawa Pemandang Mayau Sarawak 2014, ‘Let’s Share The Road’, Kimpin ‘Earth Hour’, Pro­gram Aku Sayauka Nengeri Aku, Marathon Kuching, Simposium Nengeri, Pekit Main Dart, Pekit Begendang Etnik enggau mayuh macham program bukai.

Kelimpah ari ngatur pengerami nya, Abang Abdul Wahap mega madah berindik ari semua atur pengawa ke besai diungkupka DBKU, DBKU mega disadang napi mayuh macham penapi ke patut dikemutar enggau pengelandik, lalu begunaka tiap iku orang gawa ba DBKU nya betatika chara pengawa begempung.

“Bepelasarka pengelandik DBKU ke udah mujur kan­dang 25 taun ke udah, lalu dalam kandang timpuh nya, kitai (DBKU) udah teulihka 88 iti gelar,” ku iya.

Kelimpah ari nya mega, iya madah DBKU mega betapi enggau penanggul enggau pe­mansang ke nyadi di nengeri tu, lalu ngujungka pemayuh mensia nyau majak nambah, nyengkaum sida ke pindah ari menua pesisir ngagai mengeri, betapi enggau rampa menua ke kamah ari pemayuh mensia ke udah diau di mengeri, kos pengelantang pendiau nyau majak niki, sereta penge­landik mutarka pemanah mengeri.

Iya mega ngerintaika pro­jek-projek ke diungkup ke DBKU ke deka belabuh digaga taun tu, entara nya (Bulatan Datu Abang Ki­pli), ngaga Muzium Sejarah Sarawak, ngaga ‘Samariang Resort City’, Projek Darul Hana, Taman Warisan eng­gau Jembatan Emas ‘S’ ke deka digaga ari Kompleks Opis Kunsil Nengeri meraka Sungai Sarawak ngagai Kuch­ing Waterfront.

Iya nandu, DBKU seruran bepegai ba konsep CBS (Man­ah, Beresi enggau Bepengerai ) dalam tiap pengawa ke digaga sida iya, lebih agi DBKU nga­rapka Bandaraya Kuching tu deka diberi gelar nengeri ke pengabis popular di Asia Teng­gara manggai taun 2017.

Kelimpah ari nya, setipak enggau pemansang teknologi pemadah diatu, ‘Majlis Ber­sama Jabatan’ (MBJ) diatu udah bisi ‘Facebook’ kediri empu ke diberi kelala sida iya berandau.

Ba atur pengawa nya mega, Abang Abdul Wahap mega bejadika ‘Blog MBJ DBKU’ ke nyadi entara orang gawa ba DBKU enggau opis pen­gatur.

Sama bisi ngulu atur pen­gawa nya kemari, Direktor DBKU, Dr Saadiah Abdul Samat enggau Ketuai Sapit Direktor, Kartini Zamhari.