SIBU: Opis Penyah Penusah enggau Pengerara Api (BOMBA) sitak Sibu udah nerima 330 iti kangau ari mensia mayuh sepemanjai taun 2013.
Ketuai BOMBA Zon 4 Sibu Abdul Mutalib Rashid madah, ari penyampau kangau nya 191 iti kangau diterima Opis BOMBA Sentral Sibu lalu 139 iti diterima Opis BOMBA Sungai Merah.
“Sepemanjai taun 2013 kitai mujur nyelamatka keresa beungkus urung RM22.44 juta lalu penyampau pengerugi ke dirikut iya nya urung RM283.84 juta,” ku iya madah maya dikerandau pengarang berita, kemari.
Dulu agi ari nya iya ngulu pengerami nyuaka kelai ngagai raban BOMBA ketegal udah mujur ngidupka empat iku mansa maya penusah angus ke nyadi ba sebuah rumah di Jalai Deshon kena 4 Oktober 2013 taun nyin tadi.
Pengawa tu dipenyadika Kaban Kunsil Nengeri (ADUN) Jemoreng Abu Seman Jahwie ba Opis BOMBA Sungai Merah ditu, kemari.
Nandu jaku iya, ari penyampau ke dirikut nya, kategori babas enggau kampung angus dirikutka pemadu mayuh iya nya 145 iti kes lalu ditangkan kategori pekara bukai iya nya 82 iti kes.
“Kategori rumah enggau rumah alai diau mega bisi ngerikut 54 iti kes,” ku iya.
Abdul Mutalib mega madah, sepemanjai taun 2013, bisi dua iti kes naban ke nyawa nyadi.
Ku iya, kes keterubah nyadi ba Tanjung Manis alai seiku lelaki bansa India bebadi ba penusah angus kena bulan Oktober taun seiti nyin tadi.
“Pemadu baru iya nya, kena 25 Disember tu tadi, seiku lelaki bebansa Filipina bebadi sepengudah bilik siwa iya ba Jalai Wong Nai Siong angus,” ku iya.