KUCHING: Palan Pemindah Tasah Bah ke di Dewan Sukan Tatau (Bintulu) aja udah ditutup.
Naka pukul 8.55 pagi kemari, semina Dewan Sukan Tatau aja ke udah ditutup tang Dewan Masyarakat Bakong agi dibuka.
Pemayuh orang ke numpang diau di Dewan Sukan Tatau nya bisi dalam 18 ruang bilik mungkur 67 iku mensia diatu udah pulai ngagai rumah diri.
“Semina Dewan Masyarakat Bakong ke agi dibuka endur 12 ruang bilik mungkur 52 iku mensia,” ku Menteri Pengelantang Pendiau, Pekara Orang Indu, enggau Pemansang Ruang Bilik, Datuk Fatimah Abdullah madah ba aum media pengudah bejadika Taska Permata Perpaduan Kompleks Perintah Besai di Jalai Simpang Tiga ditu, kemari.
Iya madah diatu Menteri Muda ari opis menteri nya, Robert Chuat benung dalam pejalai ngagai Miri meresa endur di Dewan Masyarakat Bakong ke sama disempulang JKMS enggau Komiti Tasah Bah menua, lalu beratika enti sida ke numpang diau ba dewan nya udah tau pulai ngagai rumah tauka enda.
Ba pekara ke sebaka, iya madah sekula ke agi tutup kena ampuh bah naka kediatu, SK Klid (Dalat) laban blok sekula enggau dapur agi ampuh.
Nambah ke nya, SK Kenyana (Mukah) mega baru ditutup laban beratika ai deras enggau SK Nanga Bon (Sibu).
“Udah ai surut ila, baru sekula nya ulih mansik perengka guna ke rusak ketegal bah, lalu pekara nya ila deka dipadah ngagai Opis Menteri Pelajar (KPM) ngambika ulih diberi ungkup kena ngaga perengka guna sekula ke rusak,” ku Fatimah.
Sebedau tu (minggu nyin tadi) entara sekula ke ditutup ketegal ampuh bah, SK Tagageng (Subis, Miri), SK Kpg Klid (Dalat), SK Nanga Nyuruk (Kanowit), SK Nanga Bon (Sibu), SK Ulu Sg Sengan (Sibu) enggau SK Sg Salim (Sibu).