KUCHING: Perintah Sarawak nengah Komiti Penyah Penusah Nengeri ngelanggur deka ngenataika peminta bantu tasah RM500 ngagai Komiti Penyah Penusah Bansa dikena mantu orang ti kena penusah ampuh bah renggat nengeri.
Menteri Pengintu Pengelantang, Pekara Orang Indu enggau Pemansang Ruang Bilik, Datuk Fatimah Abdullah madah, bantu RM500 ti diberi ngagai orang ti kena penusah ampuh bah baka ti dikemeranka di Semenanjung Malaysia bisi pematut dikemeranka renggat nengeri.
Taja pia ku iya, pemutus pekara nya bepanggai ngagai Komiti Penyah Penusah renggat nengeri enggau bansa.
Iya ti ngarika opis menteri iya ke nyadi kaban Komiti Penyah Penusah Nengeri bepenemu, chara nya patut dikemeran dikena ngelempung penusah orang ti kena tasah bah.
“Komiti Penyah Penusah renggat nengeri deka baum, kena nentuka pekara ti patut dikemanah, lalu aku arap bendar bantu nya deka dikerandau dalam aum, ambika banding di Semenanjung Malaysia orang ti kena tasah bah deka nerima bantu RM500, aku arap bendar nya ulih berengkah dikemeranka renggat nengeri.
“Ba penemu aku bantu ti baka nya endang patut, laban aku meda ba kandang endur ti dilawa aku endang mayuh pengerusak ba rumah baka lantai rumah tebabak enggau reta tengkira ke bukai jai.
“Pekara tu bisi diperundingka ba renggat nengeri sereta deka dikenataika ngagai renggat atas, taja pia kitai bepanggai ba pemutus Komiti Penyah Penusah Negeri enggau Bansa, sekalika patut tauka enda,” ku iya ti enggai besemaya dulu bekaul enggau pengulih bantu nya diberi.
Fatimah mansutka pekara nya lebuh ditanya sekalika rayat Sarawak ti kena penusah tasah bah bisi diberi bantu RM500 baka ti dikemeranka di Semanjung Malaysia.
Iya ngarapka kededua komiti penyah penusah renggat nengeri enggau bansa patut ngangkatka pemanah ba pengawa nyaga pengelantang rayat ti kena penusah tasah bah.
Ku iya, naka ke diatu bantu ke diberi Komiti Penyah Penusah Nengeri iya nya nyendiaka barang pemakai di palan pengenduh penusah bah enggau orang ti putus penyambung ketegal bah.
Dulu ari nya Fatimah ngulu sereta nyuaka bantu kereban iya nya injin jait enggau kereban kena ngaga biskut enggau roti ngagai 44 iku pesereta 1AZAM ti dilatih Society for Kuching Urban Poor (SKUP) ke nyadi ijinsi ti diberi tanggungpengawa ngelatih pesereta.