KUCHING: Parti Sa’ati Rayat Sarawak (SUPP) udah ngaga pemutus enda deka mantaika sebarang pemutus ke digaga Central Working Committee (CWC) bekaul enggau atur ke dilempai ba Chairman SUPP Pampang Sibu Dato Sri Wong Soon Koh nengah surat berita.
Kena malam ensana, Sekretariat parti udah nerima jaku sukung ari Komiti Disiplin bekaul enggau Notis Mantaika Kebuah ke dianjung ngagai Wong tang taja pia, sebarang pemutus bekaul enggau notis nya semina Wong enggau parti aja nemu.
“CWC udah nerima jaku tangkan ari Komiti Disiplin bekaul enggau pemutus ke dianjung ngagai Wong.
“Manah agi pemutus nya diberi nengah surat dulu dianjung ngagai iya (Wong) sebedau kami mantai ngagai media,” ku iya.
Ba aum nya mega, CWC ngelalau Wong ti mega nyadi Menteri Penguasa Kandang Menua enggau Pemansang Komuniti berunding dulu enggau komponen parti Barisan Naasional (BN) baka ke seruran digaga ngelama tu sebedau nyiri pengari nyadi kaunsilor, tuai raban bansa enggau ketuai komuniti di menua tu nengah chara berandau tauka nerima penemu ari SUPP Pusat bekaul enggau pekara nya.
“Taja pan CWC seruran ngelalau Wong nagang ngereja utai bansa nya, tang iya majak ngadu pengawa nya kediri,” ku iya.
Kelimpah ari nya, dalam aum CWC mega bisi bejuraika penyendia parti dalam ngatur Aum Besai Deligit Tiga Taun Sekali (TDC) lalu merambu utai ke patut dikereja kena napi pengawa bepilih sebedau dianjung ngagai CWC.
CWC mega udah ngansak TDC patut diatur tumu ke agi iya nya dalam bulan Disember.
“Tu laban TDC nitihka atur demokratik baka ke udah diberi mandat ulih undang-undang parti, ngambika tusun baru ketuai pampang enggau ketuai ba renggat CWC ulih dipadu nguluka parti nya dalam pengawa bepilih ti disadang deka diatur dalam suku keterubah taun 2016,” ku penerang surat nya.