Anda di sini

Nembiak SPDP minta ketuai menua ngenyelap isu ‘Allah’ enggau jampat

Advertisement

MIRI: Raban Nembiak SPDP minta ketuai menua ditu madamka enggau lengkas penyarut jaku “Allah” enggau fanatik tegeram ngambika pemaik ulih diasai baru dalam menua kitai ke ngembuan mayuh bengkah jalai pengarap enggau main asal.

Ketuai Nembiak Robert Ayu madah, pengawa nyerungkai ke dipejalaika JAIS, ba opis Gerempung Injil Malaysia (BSM) minggu tu tadi lalu ngerampas lebih 300 iti Al-Kitab enggau Bup Kudus nya sebengkah pengawa ke kasar sereta enda bebasa.

“Ketuai menua patut madamka isu tu enggau lengkas,“ ku iya madah nengah SMS ngagai The Borneo Post, ensana.

Robert udah nerima mayuh SMS nyengkaum sekeda nya kasar munyi setegal pekara ke berampaska Al-kitab, Bup Kudus ungkup orang Keristin di Selangor ke baru udah nyambut Hari Krismas.

Iya madah, endang gaya pengidup mensia endang bisi meri timbal balas, ku iya: “Enti isi digetil, endang bisi mega kitai ngasaika pemedis lalu tu baka berekat dalam pemedis ke diasai seraya pemedis tu deka ngerakup bala Keristin ngambi sama-sama meremika pala patung lalu besemak enggau Petara,“ ku iya.

Robert, seiku luyar bansa Kelabit bepengarap Keristin ari Bario, madah, sebedau tu udah nyadi pekara bala pemesai fanatik dalam taun 2008 ke alai majalah Katholik– ‘The Herald’ ditagang ari nguna jaku ‘Allah’.

“Maya aku belajar di universiti dalam ujung taun 80 di Selangor, kami besembiang dalam kampus nguna jaku kami empu ngena (jaku) ‘Allah’. Nadai bisi orang pedulika kami laban ke enda empelita ngena dipeda tauka didinga bala Muslim,“ ku iya mulaika pengingat.

Seraya nya pekara ke baru udah nyadi, Eksekutif Kunsilor Nengeri Selangor ba pekara pengarap Sallehen Mukhyi udah baum sejam enggau editor ‘Catholic weekly The Herald’ Rev Father Lawrence Andrew kemari, MP Klang Charles Santiago enggau MP Seri Andalas Xavier Jeyakumar ba opis sekretariat nengeri di Shah Alam.

Sallehen udah nya deka minta pemutus ari Opis Menteri dalam nengeri ba pengentap penemu sida dalam sempekat 10-poin, ke ngemendar Al-Kitab diimport udah bekau ke ditagang.

“Kitai senurut enggau penemu Sultan Selangor, kitai mega deka betatika gaya iya berasuk enggau sempekat 10-poin ari kabinet.”

Sallehen bekenangka bekaul enggau JAIS ke ngembuan hak tama ngagai opis BSM minggu nyin kemari lalu ngerampas lebih ari 300 Al-kitab enggau Bup Kudus.

Advertisement