Anda di sini

Mensia mayuh diperansang masuk HHS seraya ngenataika servis ngagai orang tuai enggau OKU

Advertisement

KUCHING: Opis Pengintu Pengelantang Raban Bansa Nengeri (JKMN) bisi nyendiaka program Khidmat Bantu Di Rumah tauk ‘Home Help Services’ (HHS) ti meri sukung tauka bantu ngagai orang tuai enggau orang nyelai pendiau (OKU).

Menteri Pengintu Pengelantang, Pekara Orang Indu enggau Pemansang Ruang Bilik, Datuk Fatimah Abdullah madah, servis nya dipejalaika sukarelawan ti udah dilatih JKM sereta nerima surat chiri ari Direktor JKMN.

“Taun nyin kemari, JKM di nengeri tu bisi numbuhka program Home Help Services ke alai naka ke diatu bisi 146 iku sukarelawan di Kuching.

“Servis tu iya nya ‘social outreach’ ti meri sukung tauka bantu ngagai orang tuai enggau OKU.

“Raban sukarelawan ke udah dichiri deka meri servis baka nyendiaka pemakai enggau ai irup, meresi rumah, meli barang ke dikena ninting hari, nulung mai orang ke sakit ngagai sepital/klinik, nyempulang ngagai rumah endur besembiang enggau ke bukai nitihka pematut,” ku Fatimah.

Iya mansutka pekara nya lebuh dikerandau maya ngabas rumah seiku orang ti kala nyadi jurugambar surat kabar Sarawak Tribune (1986-2013), Lu Theng Heng, 62, ditu kemari.

Iya ngelalau orang ti deka nguna servis enggau minta nyadi sukarelawan patut ngenataika peminta ngagai JKMN.

Ngenang pejalai iya ti ngabas Lu, iya madah, JKM meri RM300 sebulan iya nya Bantuan Orang Tua (BOT) berengkah ari bulan November 2013.

Lu ti nyereta pengawa media ari taun 1973 ti udah gawa enggau sekeda surat kabar China ditemu betapi enggau penyakit riman prostate sereta tiga bulan ke udah enda ulih angkat agi.

“Naka ke diatu Lu nerima BOT ari JKM iya nya RM300 sebulan. Udah tu ila kitai deka mekuh ngagai bakani kitai ulih nulung iya ngambika bulih bantu ari SOCSO.

“Kami (JKM) mega minta bini iya ngenataika peminta ngagai Home Help Services ngagai JKM ngambika bisi nulung meresi rumah, bebelika barang diguna ninting hari sereta nganjung ngagai sepital,” ku iya.

Berebak enggau tu iya madahka diri temegah ati ngagai Persatuan Jurufoto Media Sarawak ti baru ditumbuh sereta dikemendarka Opis Pengerejister Gerempung (ROS) kemari pukul 10 pagi, ti bebendar deka mantu Lu sereta pengelantang kaban gerepung baru nya.

“Aku berasai gaga sereta temagah ati ngagai Persatuan Jurufoto Media Sarawak, tu chara ti chukup engkeman sereta nunjuka penegap bebakih enda ngira maya tusah enggau senang,” ku iya.

Advertisement