KUCHING: Penyampau orang ti kena penusah tasah bah di nengeri tu kemari (8 Januari) naka pukul 4 lemai bisi nurun, ti ngerikutka sepenyampau 3,398 iku orang ti mungkur 827 ruang bilik enti dibandingka enggau ensanus (7 Januari) bisi 11,503 iku orang ti mungkur 1,756 ruang bilik.
Tebal agi orang ti mengkang tejanggal ketegal penusah bah di bagi menua Miri ti bisi 2,749 iku orang ti mungkur 615 ruang bilik, lalu ditangkanka Sibu (287 iku orang, 81 ruang bilik), Bintulu (235 iku orang, 109 ruang bilik) enggau Betong bisi 127 iku orang ti mungkur 22 ruang bilik.
Penurun penyampau orang ti kena penusah tasah bah nya berindik ari gaya hari ti bisi manah.
Bepelasarka statistik penusah bah ti diberi ari opis pemadah kemari, semina dua aja palan pengenduh penusah bah agi dibuka iya nya Dewan Mensia Mayuh Bakong enggau Dewan Suarah KPSU Tatau.
Bisi 138 iku orang ti mungkur 33 ruang bilik dipindah ngagai dua palan pengenduh penusah bah nya kemari ti nyengkaum 64 iku orang ti mungkur 16 ruang bilik ari Kpg Dagang, Tatau dipindah ngagai Dewan Sukan KPSU Tatau enggau 74 iku orang ti mungkur 17 ruang bilik ari Kawasan Setinggan, Bakong dipindah ngagai Dewan Mensia Mayuh Bakong.
Nambahka nya, ‘Laporan Pengoperasian Sekolah Yang Dilanda Banjir atau Jalan Kesekolah Terputus Akibat Banjir (sekolah Ditutup)’ ari Opis Pelajar Nengeri (JPNS) naka pukul 4 lemai kemari lima sekula agi mengkang ditutup.
Tebal agi sekula ti agi mayuh ditutup di bagi menua Sibu iya nya SK Nanga Bon (83 iku nembiak); SK Sg Salim (106 iku nembiak) enggau SK Sg Siong Tengah (83 iku nembiak).
Di Kanowit sekula ti agi ditutup iya nya SK Nanga Nirok ke bisi 54 iku nembiak lalu di Dalat iya nya SK Kpg Klid/Plajau bisi 89 iku nembiak.
Lima buah sekula nya agi ditutp ketegal tikas ai agi tinggi, kandang sekula ampuh bah sereta jalai ngagai sekula mega ampuh bah.
Kelimpah ari nya, riput gaya hari ti dikeluarka Opis Pengamata Gaya Hari Malaysia Pampang Sarawak naka 3.30 lemai kemari (8 Januari) nunjukka gaya mua hari mambam di barat Sarawak.
Bepelasarka gambar satelit enggau imej radar pukul 2 lemai enggau 3.20 lemai nunjukka titik mit remang tebal agi di bagi menua Kuching enggau Samarahan. Lalu ba sekeda bagi menua bisi mambam/ujan enda lama.
Dipelabaka muakka malam kemari, ujan dipelabaka nyadi di bagi menua Sarikei, Sibu, Mukah, Bintulu, Kapit, Miri enggau Limbang lalu muakka dini hari dipelabaka di bagi menua tebing tasik Sarawak.
Ba timpuh tujuh hari ti deka datai, gaya hari nengeri Sarawak dipelabaka agi mambam ba mayuh bagi menua kelebih agi di kandang menua pesisir sereta kandang menua di tebing tasik.