Anda di sini

BSH ex-soldadu patut ditiki ngagai RM820 sebulan

Advertisement

SIBU: Gerempung Veteran Soldadu Malaysia Nengeri Sarawak (PVTMS) minta perintah mansik pengawa meri Bantu Pengelantang Pengidup (BSH) ninting bulan ngagai ex-soldadu ke enda bepinchin tauka diberi ngagai balu sida.

Presiden gerempung tu Thomas Ling Kui Eng madah, bantu baka tu beguna bendar kelebih agi ngagai raban Sarawak Rangers enggau Sarawak Trackers dulu suba.

“Udah sida badu gawa tebal agi sida natam diau ba rumah panjai di ulu sungai.

“Sida tu beguna ke bantu ari perintah tambah mega sida nadai bepenatai pemisi kelimpah umur nyau majak tuai setuai,” ku iya madah maya aum media ditu, ensana.

Ku Thomas, raban ke bukai ti patut bendar nerima bantu baka tu iya nya ex-pemesai enggau raban macham pangkat ke bukai iya ke nadai nerima pinchin nyengkaum sida dikemaduka gawa ketegal penanggul disiplin baka raban ATM, raban Sukarelawan ti gawa enggau ATM, Force 136 enggau soldadu British ke gawa di Malaya/Malaysia tauka Singapura.

“Kitai chakah ngemeratka pengidup ex-soldadu ke enda bepinchin tauka balu sida ngambika ulih ngasaika pengidup ti lantang maya hari tu muji dulu suba udah berambun nyawa begadai seput ngetanka pengelikun baka ke udah diasai kitai nyentukka sehari tu.

“Nya alai, gerempung kami ngarapka perintah ulih meri BSH sepenyampau RM820 sebulan ngagai ex-soldadu enda bepinchin tauka ngagai balu sida,” ku iya.

Thomas madah, taja ex-soldadu enda bepinchin gawa kurang ari pengelama 21 taun tang sida bela megai tanggungpengawa ke sebaka enggau raban soldadu ke bukai maya ngetan pengelikun menua dulu suba.

Ba serata Malaysia, ku iya, raban ke enda bepinchin iya nya urung 243 ribu iku lalu ba Sarawak nadai rikut ti nyata dikembuan.

“Tang kitai melabaka lebih 8,000 iku ex-soldadu enda bepinchin ba nengeri tu.

“Ketegal nadai ngembuan rikut, gerempung kami udah minta perintah nyidi sereta ngaga banchi ex-soldadu di Sarawak,” ku tandu iya.

Berindik ari pekara tu mega, Thomas madah, pekara minta perintah mansik pengawa meri BSH ninting bulan deka dipejuraika maya Aum Ninting Taun ke deka diatur di Kuching kena 15 March ti deka datai.

Iya madah, enti pekara nya nerima sukung ari semua raban, gerempung sida deka mai pekara nya ngagai Menteri Besai nengah Menteri Penyaga Pengelikun Menua.

Thomas mega madah, naka ke diatu raban sida bisi diberi bantu nengah Sekim BSH ari Opis Pekara Veteran ATM sepenyampau RM100 ngagai RM300 ninting bulan dalam kandang tiga taun lalu tau dipinta baru enti sema bantu nya agi dikena.

“Taja pan baka nya, naka ke diatu di Sarawak aja, pemadu mayuh ke diterima iya nya semina RM150,” ku iya.

Thomas mega madahka gerempung sida enda lantang ati enggau Sekim BSH nya laban peminta deka ngulihka bantu nya semina deka tembu antara enam ngagai lapan bulan tauka lebih ari nya nyengkaum bisi sekeda enda ampit ngasaika bantu laban udah parai.

Timpuh alai ngemendarka peminta bantu nya, ku iya, bangat kelalu lama alai raban sida nganti.

“Ketegal penusah nya kitai udah mantaika pekara tu ngagai Kepala Direktor Opis Pekara Veteran ATM ngambika Sekim BSH ulih dikemendarka semina dalam kandang tiga bulan aja.

“Kitai ngarapka penanggul ke nuntung raban ex-soldadu nyengkaum sida ke enda bepinchin ulih diputarka enggau lengkas kelimpah randaka kerejasama ari mensia mayuh, kelai kitai rebak diatu beterima kasih ngagai pemerani sida ngelaban munsuh ngulihka pengelikun menua dulu menya,” ku iya.

Advertisement