Anda di sini

Takah Sepintu mujur tesaguka ‘Mangkuk YB Alexander Vincent’

Advertisement

BESAI AGI PERAIS TAUN DUDI: Alexander (bediri baris kesatu, empat kiba) enggau sekeda orang bukai begulai enggau bala pemenang.

BEBENDAR: Maya pekit anatara Takah Sepintu enggau Real Kubota.

KANOWIT: Takah Sepintu champian ba pekit main bol 9-sepiak berebutka ‘Mangkuk YB Alexander Vincent’ ke baru udah tembu atur di SK Sungai Tuah ditu kena Hari Minggu tu tadi.

Tim nya ngalahka Real Kubota 2-1 nengah sipak penalti udah sida seri 1-1 ba final.

Tempat ketiga dimenang Dunia Ria TV1 seraya Dayak Revolution bulih lumur empat.

Takah Sepintu menang mangkuk, duit RM700, trofi enggau midul.

Real Kubota enggau Dunia Ria TV1 bela bulih RM500 enggau RM300. Tim nya mega bulih trofi enggau midul.

Dayak Revolution diberi RM100.

Bisi 11 bengkah tim ngambi bagi dalam pekit dua hari nya ke diatur Parti Rakyat Sarawak (PRS) Sungai Tuah.

Bejadika pengawa nyuaka perais, ADUN Ngemah Alexander Vincent madah, iya deka nambahka duit perais ngagai RM1,000, RM800 enggau RM600 ungkup champian, kedua enggau ketiga taun baru tu ila.

Iya madah, tu ngambika narit mayuh agi penyereta ila.

Main ke baka nya, sebengkah jalai ke manah dikena ngempuru bala nembiak dalam kandang menua nya.

Penghulu Barnabas Angkis, Penghulu Ugap Seribu enggau Penghulu Ijam Tuah nya sekeda orang ke bisi datai ba pengerami nyuaka perais nya.

Advertisement