SIBU: Perintah udah ngemendarka RM11.3 juta dikena ngemansangka perengkaguna mensia mayuh ba projek pemansang Kampung Datu Baru ba renggat keterubah, kedua enggau ketiga.
Menteri Pemansang Pengawa Berumah Datuk Amar Abang Johari Tun Abang Openg madah, projek tu digaga ari baruh Opis Menteri Pengawa Berumah lalu dipejalaika Opis Pemansang enggau Pengintu Tanah (PELITA).
“Projek Ngemansangka Baru Kampung Datu tu mungkur 208 buah rumah enggau 300 ngagai 500 buah ruang bilik nyengkaum peranak ari Kampung Hilir Sibu.
“Projek tu deka bekenaka 326 ekar pemesai tanah ti dibagi 26 ekar ungkup projek renggat keterubah lalu 300 ekar ungkup renggat kedua enggau ketiga.
“Pengawa tu ila bisi ngubah palan nya nyadi palan pengentap pendiau ti likun agi, betusun sereta lantang dipeda,” ku iya madah maya aum media lebuh nemuai ngagai palan projek ditu, lemai kemari.
Dulu agi ari nya, iya bisi diterangka enggau silik senentang projek ari Manijer Besai Bagi Keresa enggau Injinia PELITA Monaliza Zaidel.
Bela bisi datai maya pengawa tu iya nya Menteri Penguasa Kandang Menua enggau Pemansang Raban Bansa Dato Sri Wong Soon Koh, Menteri Muda Pemansang Pengawa Berumah Datuk Abdul Karim Hamzah, Kaban Kunsil Nengeri (ADUN) Nangka Dr Annuar Rapaee, Temenggung Datuk Wan Hamid Adruce enggau bala pemesai ke bukai.
Abang Johari madah, ba projek renggat keterubah tu bisi 175 lot digaga ke nyengkaum pengawa nyungkur taba, ngaga entali ai, jalai alun, perengkaguna mensia mayuh enggau ngaga rumah ke ulih diempu (Rumah Mampu Milik).
“Pengawa nyungkur tanah ba taba Kampung Datu Baru udah tembu bulan November 2013 enggau ungkus RM6.5 juta.
“Nangkan ke nya, pengawa ngaga perengka guna mensia mayuh udah berengkah kenyau 3 Januari tu lalu diperambu deka tembu bulan September.
“Pengawa tu nyengkaum nyendiaka jalai alun, entali ai enggau utiliti ti badas sereta betusun,” ku tandu iya.
Iya mega madahka projek renggat kedua enggau ketiga deka ngemanahka agi pemansang baru Kampung Datu ke udah digaga enggau rumah deka digaga ba palan Sivilculture, Batu 11, Jalai Ulu Oya.
Projek renggat nya dikena napi penyampau rumah ke patut digaga ungkup ruang bilik ti mayuh nyengkaum peranak ari palan ke besemak.
Nambahka nya, Abang Johari mega madah, Opis Menteri Pengawa Berumah Sarawak enggau PELITA benung ngaga pelin bejalaika projek pemansang ba palan Sivilculture.
“Pelin Struktur tu deka nyengkaum macham bengkah perengkaguna mayuh, rumah mensia mayuh enggau palan komersil lalu deka nyadi pasar baru ke disempulang enggau perengka ti silik dalam kandang 10 taun ti deka datai,” ku iya ngujungka randau.