DATAI NGEREJISTA: Aba (dua kiba) begulai enggau (ari kiba) MAdehi, Santokh enggau Leong ex-raban PH ngerejista nama sida ngambika ulih nerima PJPN.
KUCHING: Raban Pasukan Polis Hutan (PPH) ti kala gawa maya menua siga dipinta ngerejista nama diri enggau Persatuan Bekas Pasukan Polis Hutan (PBPPH) dikena ngenukuka enda ditinggal ari nerima Pingat Jasa Pahlawan Negara (PJPN).
Presiden PBPPH Sarawak, Datuk Aba Robiyel Huk madah, gerempung nya deka nentuka orang ti kala nyadi polis nya sekalika kaban tauka ukai kaban sama nerima tanda puji nya kelimpah ari ngemuntangka gerempung meresa lis nama sida.
“Kami beterima kasih ngagai perintah besai kelebih agi Sapit Menteri Dalam Nengeri Datuk Dr. Wan Junaidi Tuanku Jaafar ti ngingatka pengawa dikereja raban pengelikun nyengkaum orang ti kala nyadi Polis Hutan, ti ngemanjai sereta ngenataika isu ngagai perintah besai.
“Tang gerempung tu rugi, laban kami nadai rintai nama orang ti kala nyadi raban ke amat bejalaika pengawa ngetanka menua maya menua siga suba, nya alai kami minta orang ti kala nyadi polis tu datai ngerejista ngagai gerempung laban raban tu diau ngachir di nengeri tu,” ku iya ba aum pengarang berita ba opis See Hua Group ditu, apin lama ke udah.
Ari nya ku Aba, gerempung ulih mantu sida nengah mayuh rintai nama ti bisi disediaka Opis Bukit Aman dikena nentuka pengulih nerima tanda puji nya.
Ku iya Sarawak dipelabaka bisi urung 2,000 iku orang ti kala nyadi Polis Hutan sekalika kaban tauka ukai kaban gerempung ti diau ngachir di nengeri tu.
“Kami deka nentuka semua orang ti kala nyadi polis tu datai ngerejista diri laban kami deka ke rikut ti berurun lalu nadai bayar enti deka nyadi kaban.
“Kami mega melabaka mayuh ti udah nadai (parai), nya alai gerempung minta orang ti sebilik enggau sida niang sekalika apai indai, bini tauka anak ulih nyadi pengari nerima tanda puji nya,” ku iya seraya madahka tanda puji nya diberi ngagai raban polis nya ti udah parai.
Tandu Aba, orang ti kala nyadi kaban polis tu dipinta datai tauka telefon ngagai gerempung sebedau ujung bulan Januari tu.
Raban tu tau telefon ngagai Aba ba lumur 013 8682238 tauka Sekretari Dipebasa gerempung Leong Thian Cheng (012 8096543), kaban komiti Santokh Singh (019-8891456), Sapit Sekretari Dipebasa Sanchez Masleh (019-821 7781) enggau kaban komiti gerempung Madehi Kassim (012-8475525).
Dalam surat kabar apin lama ke udah sepenyampau 1,000 Pingat Jasa Pahlawan Negara deka diberi ngagai penerima di Sarawak ba renggat keterubah pengawa meri tanda puji nya berengkah taun tu.
Wan Junaidi madahka penerima ti nerima pingat nya nyengkaum polis, soldadu enggau mensia mayuh ti ngetanka menua maya menua siga lalu di Sarawak maya menua siga berengkah ari taun 1962 ngagai 1990, ari taun 1948 ngagai 1960 enggau 1969 ngagai 1989 di Semenanjung Malaysia.
Iya madah, Sarawak nengeri keterubah meri pingat nya sereta dikearapka dipejalaika ba bulan tu.