BINTULU: Perintah nengeri enggau naka alah meri bantu ngagai rayat ba menua tu ti kena tasah laban penusah ampuh bah.
Menteri Pengintu Pengelantang, Pekara Orang Indu enggau Pemansang Ruang Bilik Datuk Fatimah Abdullah madah, perintah nengah Opis Pengintu Pengelantang Raban Bansa (JKM) dikena ngagihka bantu baka barang pemakai enggau perengka diguna ninting hari ngagai sida ti kena tasah laban ampuh bah.
“Naka ke diatu, JKM begulai enggau polis, raban BOMBA enggau agensi bukai ti sama bela ngembuan tanggungpengawa mantu endang udah bejalaika pengawa enggau chukup manah bepun ari ti mindahka sida ke kena tasah ngagai palan pemindah ampuh bah ti udah ditetapka nyentukka pengawa meri bantu pemakai enggau perengka dipeguna bukai,” ku iya mansutka jaku maya betemu sereta meri tulung ngagai sida ti tasah laban ampuh ba palan pemindah ba Dewan Sukan Tatau, apin lama ke udah.
Tandu Fatimah, sida ke kena tasah tu mega deka digelumu ba seiti palan pemindah ngambika muntang agi agensi perintah enggau swasta meri tulung ngagai sida baka barang pemakai, tilam, pua enggau perengka bukai ti dipegunaka sida.
“Pia mega, ngagai sida ke kena penusah ti enda ulih pindah ari rumah ketegal putus penyambung endang diberi bantu barang pemakai ti umbas empa sida seminggu seraya ke nganti ai surut sereta jalai ulih ditengah.
“Semua tu nunjukka perintah semampai sinuka rayat ti napi penusah bakatu nengah mayuh bengkah chara ke pengelantang pendiau sida.
“Beduduk enggau tu, aku ngelalau mensia mayuh kelebih agi enti sema rumah kita ampuh pindah enggau naka penyampat kena nyeliahka penusah bukai nyadi,” ku iya.
Pia mega, ngagai peranak ke diau ba tanah ti baruh ba menua tu madah tumu ngagai raban BOMBA tauka piak ke bekaul ngambika sida ulih mantu pindah ngagai endur ti likun agi.
Berebak enggau nya mega, Fatimah bisi nyuaka bantu ngagai tetiap ruang bilik ti agi diau ngenduh enda lama ba palan pemindah.
Pemesai Pelilih Menua Mit Tatau Nyurak Keti enggau Penghulu Sanok Magai antara ke bisi datai.