Datuk Fatimah Abdullah
KUCHING: Perintah ngembuan inisiatif sereta deka chakah numbuhka Palan Nyeridi Anak Mit (TASKA) Nyelai Pendiau (OKU) di nengeri tu.
Menteri Pengintu Pengelantang, Pekara Orang Indu enggau Pemansang Ruang Bilik, Datuk Fatimah Abdullah madah, ke diatu opis menteri semina mekuh ngagai sekula primari enggau sekondari aja.
“Inisiatif opis menteri (Opis Menteri Pemansang Orang Indu, Ruang Bilik enggau Raban Bansa) diatu deka chakah numbuhka TASKA OKU.
“Nya alai diatu kitai ukai semina mekuhka nembiak OKU teulihka pelajar ba renggat sekula primari enggau sekondari aja tang mega ba renggat pelajar tumu anak mit, kitai deka berengkah ari pun.
“Diatu semina bisi sebuah aja di Sarawak iya nya TASKA OKU Autisme di Sibu, ti udah berengkah taun nyin kemari,” ku Fatimah lebuh dikerandau ba aum pengarang berita maya bejadika Quantum Launching Center ditu pagi kemari.
Nitihku penerang iya, di Sarawak belepasarka rikut naka bulan Disember 2013, bisi enam kelas OKU dibuka ba sekula biasa sereta bisi sepuluh kelas ti mungkur empat buah sekula SK Pendidikan Khas.
Penyampau semua nembiak OKU iya nya 50 iku ti nyengkaum 16 iku nembiak ba SK Pendidikan Khas enggau 34 iku ba sekula biasa, ku iya.
Fatimah dalam aum pengarang berita ti sebaka lebuh ngenang Quantum Neurofeedback Center ti baru dipenyadika, iya madahka palan nya mega ulih mantu OKU nyengkaum Autisme, Dyseklesia enggau kebukai kelimpah ari orang ti bisi penusut runding, penanggul enggau tinduk enggau ke bukai bekaul enggau untak.
Iya madah, nya palan keterubah di Sarawak kelimpah ti udah di buka di Pulau Pinang enggau Singapura.
“Seharitu (kemari) kitai bejadika Quantum Neurofeedback Center iya nya palan keterubah ti dibuka di Sarawak.
“Palan tu ukai semina ulih mantu nembiak OKU tang mega nyangkaum orang ke nadai penanggul tang deka teulihka penyulut tinggi, mantu orang bisi penanggul tinduk, tusut runding enggau kebukai.
“Nengah palan tu kitai ngarapka ulih ngurangka penanggul sesiku orang,” ku iya seraya madahka perintah bisi nyendiaka Palan Dalam Komuniti enggau kebukai dikena ngelatih nembiak OKU ngambika teulihka pengelandik sereta ulih ngati ke diri.
Ba pengerami nya, Quantum Brain Power Sdn Bhd bisi meri geran ngagai empat gerempung iya nya JKM Sarawak; Gerempung Autisme Kuching; Salvation Army enggau Gerempung Disleksia Sarawak.
Nyempulang Fatimah dalam aum pengarang berita, Quantum Appointed Consultant Drs. Muhamad Sophian Nazaruddin enggau Manijar Besai Quantum Neurofeedback Center Timothy Chai.