PENGAWA BEJAIT UKAI LEMPUNG: Nora (bediri belakang kiba) enggau sekeda ari penyereta PLKE, lalu entara nya seiku penyerta Iban, Nancy Saran (dua kanan) ke udah bisi bisnes ngaga baju.
LELAKI PAN LANDIK BEJAIT: Mohd Hakim, siang hari belajar bejait laban ngiga penemu, malam nyual ‘burger’.
KUCHING: Injin jait dikesema baka pengias maya kitai lantang senang tang maya kitai tusah sereta suntuk, injin jait nya meh besai reti lebuh maya suntuk sandat, ku munyi sebana Menijer Palan Latih Kraf Jari Epal (PLKE) Nora Amit lebuh nusui pemerat ngembuan penemu bejait ba raban indu, kemaya hari tu.
“Nitih sebana jaku Melayu ‘Sediakan payung sebelum hujan’. Injin jait nya mega dikemerat kena ngulihka pemisi ba seiku bini orang ke belajar bejait ba kami ditu, udah laki iya parai. Ruang bilik orang tu ruang bilik ke bepemisi. Maya nyambut hari pengada bini iya (sebedau iya parai) iya bisi meli injin jait ke bini iya ke nyadi perais hari pengada.
“Tang laban pendiau sida iya lantang, bini iya beterima kasih laban diberi laki iya injin jait tang semina enda kala dikena, tang nyadi ‘pengias’ rumah aja. Enda lama udah nya laki iya parai, alai tudah bini enggau anak nadai endur bepanggai.
“Udah nya baru bini iya ingatka perais ke kala diberi laki iya, sebuah injin jait. Udah abis kos bejait enggau kami, bini orang nya diatu lantang baru pendiau laban muka dagang bejait ari rumah aja,” ku Nora lebuh nusui pemesai guna injin jait ba indu tauka lelaki.
Iya madah pengawa bejait ukai agi pengawa ke mit baka ke peda orang, tang diatu baik nya indu tauka lelaki ke bisi pengawa tetap tauka nadai, pengawa bejait tu ngayanka pengelandik.
Nya alai ku iya, ba indu ke nyadi indai tunggal tauka orang ke seranta, tau bendar belajar pengelandik lalu ngulihka belanja ari pengawa ke udah digaga sida iya maya belajar ba palan tu.
“Mayuh agi nguntungka diri empu laban nya nyamin dudi hari ila, tambah kitai ulih gawa kediri empu, ngurang belanja ngaga baju ke nyau beratus baka ngaga siti Baju Kurung…Asal bisi peneleba, udah chukup manah,” ku iya madah lebuh dikerandau di kedai ‘epal’ ke udah 4 taun ditumbuh di Kuching.
Di PLKE, kos ke diajar dalam kandang setaun nya pechuma tang penyereta semina dipinta maya yuran rejister sereta enggau meli perengka guna kena bejait aja.
Entara promosyen ke bisi diatu, iya nya dalam kategori RM2,499, RM10,000 enggau RM7,598 ke Kaban Kelab Orang Dagang (AKU) lalu disengkaum sekali enggau kos pechuma setaun.
Taja pia, kos pandak sama bisi disediaka enti sema orang nya enda ngambi pakej ke bisi disediaka di palan nya.
Palan PLKE Kuching dibuka ari pukul 10.30 pagi ngagai pukul 7.00 lemai, lalu jam ngambi kos nya bepanggai ba seiku-seiku, nitihka jam sida iya lepa.
“Reti nya, enda ibuh beguaika jam. Bisi sekeda nya datai pagi, udah nya tengahari berambika anak pulai ari sekula, udah nya ngalih hari sida iya pulai nyambung kos sida iya baru…Kami nadai jam tetap, barang ku penyerta nya empu maya ke nurun,” ku iya.
Di Malaysia aja bisi 18 buah pampang Palan Latih Kraf Jari Epal nyengkaum sebuah di Kuching (di Electra House, ringkat Mezzanine) enggau di Indonesia.
Entara penyerta ke bisi belajar di palan nya nyengkaum raban indai tunggal enggau sekeda ari SKUP (Sarawak Kuching Urban Poor), ke dipelanja Perintah Menua nengah Opis Pengintu Pengelantang Pendiau ari baruh program e-Kasih.
Nora ke udah 10 taun gawa enggau palan latih nya madah, tiap dua taun palan latih nya bisi ngatur meri gelar ngagai indu ‘Tokoh Wanita’ ti diberi Tuanku Puan Pahang Tuanku Azizah ti mega nyadi ‘Penaung Koperasi Dagang Seni Malaysia) ke meri kelala ngagai indu ke ngaga pengawa dagang sida iya di rumah.