PENYUNGKAK PENATAI PEMISI: Chye (kanan) nyempulang Fatimah meda sekeda pengawa pemandang bejait kreatif ke bisi dipandang ba lobi Plaza Merdeka ditu, ensana.
KUCHING: Ba penemu mensia mayuh di menua tu pengawa bejait agi dikumbai semina bejait baju aja tang enti mungkur ekonomi, iya lebih ari nya.
Menteri Pengintu Pengelantang Pendiau, Pekara Indu enggau Pemansang Ruang Bilik Datuk Fatimah Abdullah madah, pengelandik bejait sebengkah penemu ke beguna bendar laban iya ukai semina tau mantu diri tang dikena ngulih belanja.
Nya alai ku iya, sida ke indu tauka lelaki ke rinduka pengawa bejait patut beratika seni bejait chara kreatif, patut ngembuan runding ke proaktif sereta inovatif nengkebang barang tepa ke digaga ari jait bansa tu lebih agi ba pengawa nyukung pampang dagang temuai beserimbai enggau Taun Nemuai Ke Malaysia 2014.
“Tepa ke digaga ari jait ke kreatif ulih narit ati mensia mayuh kelebih agi temuai ke bisi pengerindu dalam kraf jari bansa tu, kelimpah ari tepa nya digaga ngena chura ke benama ari menua tu.
“Nya alai, ambi peluang ari pengerami Taun Nemuai Ke Malaysia 2014, ngaga produk bejait ke kreatif lebih agi ari chura menua Sarawak ke mayuh udah narit ati temuai ari menua ltasik ke rindu meda seni kitai.
“Kraf jari kitai di Sarawak tebilang di menua luar laban iya unik, lalu enti orang meli ari kitai, sida iya madah barang nya datai ari Sarawak, nya ke ngasuh orang gagit ati nemuai kitu laban produk kitai unik sereta lain ari orang bukai,” ku iya.
Fatimah madah baka nya lebuh bejaku ba atur pengawa ngarika Kepala Menteri bejadika Pengawa Pemandang Evolusi Seni Bejait Kreatif 2014 enggau ‘Business Matching’ Sarawak di Plaza Merdeka ditu, ensana.
Berindik ari nya ku iya, Perintah Menua nyukung pengawa Gerempung Seni Bejait Kreatif (PSJK) dikena mantu rayat lebih agi indai tunggal enggau SKUP (Sarawak Kuching Urban Poor) ngaga pengawa bejait tu pengawa ke ulih mai penguntung nagai sida.
“Asil ari seni bejait kreatif tu sebengkah pengawa pengelandik jari, ngaga pengawa bejait nya nitihka pengelandik runding kitai sereta ulih kena ngulihka penatai pemisi ruang bilik diri,” ku iya.
Pengawa pemandang nya belabuh diayanka ba lobi Plaza Merdeka kena 6 nyentuk 14 Januari tu, ke ulih dipeda asil ke digaga pelatih ‘epal’ ari Mostwell Sdn Bhd, lalu sekeda asil kraf jari nya ulih dibeli tekala nya.
Sama bisi ngulu atur pengawa nya kemari, Chairman PSJK Fully Chye Goet Lee, Datuk Bandar DBKU Datuk Abang Wahab Abang Julai, enggau Sekretari Mendam Opis Menteri Pengintu Pengelantang Pendiau, Pekara Indu enggau Pemansang Ruang Bilik, Rodziah Morshidi.