KUCHING: Raban Soldadu Malaysia (ATM) deka majak mantu raban bansa ti kurang benasit manah di nengeri tu nengah Program Jiwa Murni enggau Strategi Lautan Biru Kebangsaan (NBOS).
Panglima Divisyen 1 Infantri Malaysia Leftenan Jeneral Datuk Mohd Zaki Mokhtar madah, nya sekeda ari juluk besai lebih agi Divisyen 1 dikena mantu perintah ngemansangka Sarawak.
“Kelimpah ari ngenukuka pengelikun sereta pengelantang ba pekara soldadu di Sarawak enggau Sabah meruan ba tikas ti manah, raban Divisyen 1 chakah mantu perintah ngemansangka komuniti.
“Mayuh pemujur tu udah dijapai dalam program komuniti enggau pemansang di baruh NBOS enggau Jiwa Murni.
“Kami deka terus ngereja sereta ngemeratka program tu jemah ila,” ku iya.
Bejaku baru iya madah, ATM sedia mantu ngena pemisi ti dikembuan sereta ngarapka orang mayuh ti minta tulung terus ngenataika pekara nya ngagai piak sida.
Iya bejaku ba pengerami makai malam nyambut penatai Taun 2014 ba Wisma Seri Kenyalang,Kem Muara Tuang Kota Samarahan, apin lama ke udah.
Pengerami nya diatur dikena ngingat sereta meri terima kasih ngagai enam pemesai Divisyen 1 ti pindah sereta ngerami 35 pemesai betukar masuk kelimpah dikena meri terima kasih ngagai raban media ti mantu pemujur divisyen nya.
“Media udah mayuh mantu kami ngerembaika semua pengawa ngemansangka komuniti enggau ngetanka pengelikun sereta pengelantang di Sarawak nyengkaum kandang endur dibaruh kuasa Divisyen 1,” ku iya.
Mohd Zaki madah, 2013 taun ti mayuh pekara ditangkup raban Divisyen 1 kelebih agi maya menua betapi enggau insiden di Lahad Datu.
Ku iya pemesai enggau raban ari Divisyen 1 orang ti dimua maya ‘Ops Daulat’ sebedau raban enggau pemesai ari divisyen bukai datai mantu.
Ku iya mega, Divisyen 1 taun nyin kemari udah ditinggalka seiku bujang berani menua ti udah midang iya nya Pegawai Waran 1 Temenggung Datuk Kanang anak Langkau.
“Taja pan betapi enggau pemar nya, Divisyen 1 tetap keterubah enggau tegap sereta teulihka pemujur baka ngetanka pemujur nyadi divisyen ti nyulut ba renggat Soldadu Darat kelimpah ari mujur ba pekara bukai,” ku iya.