BANTU: Fatimah begulai enggau bala penerima bantu pengudah tembu pengawa nyerahka bantu ngagai sida ke dituntung penusah ampuh bah ari Lubok Bemban. Bisi ayan Supian (enam kiba) enggau Shafrie (tiga kiba).
SELANGAU: Opis Pengintu Pengelantang Raban Bansa (JKM) bagi menua Mukah udah nyuaka bantu barang pemakai ngagai 285 ruang bilik ari 18 buah rumah panjai di pelilih menua Lubok Bemban, ke udah putus jalai ketegal ampuh bah berengkah ari 30 Disember 2013 nyentuk ke 1 Januari 2014.
Menteri Pengintu Pengelantang, Pekara Orang Indu enggau Pemansang Ruang Bilik, Datuk Fatimah Abdullah madah, bantu nya deka diberi ngagai semua sida ke tasah ketegal penusah ampuh bah nengah bala Tuai Rumah di pelilih Lubok Bemban.
“Ari penyampau nya, bisi 52 pintu tauka ruang bilik ari empat buah rumah panjai di pelilih Lubok Bemban udah nerima bantu barang pemakai ari Pangkalan Hadapan ke udah ditumbuhka kitai ba genturung menua tu,” ku iya madah ngagai pemberita pengudah tembu nyerahka bantu pemakai ngagai sida ke kena tasah penusah bah pelilih Lubok Bemban ba jelatung Pasar Selangau, apin lama tu tadi.
Bantu nya ungkup 233 ruang bilik ari 14 buah rumah panjai.
Fatimah ke mega kaban Kunsil Nengeri (ADUN) Dalat madah, naka kediatu JKM udah numbuhka urung 83 buah Pangkalan Hadapan di serata Sarawak kena napi penusah ampuh bah.
“Pangkalan Hadapan tu ditumbuh endur naruh bekal pemakai. Enti bisi nyadi putus penyambung ketegal ampuh bah baka tu, kitai ulih nganjung bantu barang pemakai enggau jampat ngagai sida ke dituntung penusah,” ku iya.
Iya mega ngelalau bala tuai rumah enti rumah pegai sida bisi dituntung penusah bah semampai madah gaya pendiau rumah panjai ngagai Opis Pelilih Mit Menua.
“Tu beguna bendar ngemuntangka Opis Pelilih Mit Menua enggau piak ke bekaul meri bantu enggau jampat ngagai semua rayat ke dituntung penusah bah,” ku iya.
Kelimpah ari ku Fatimah, nitihka riput ari Unit Pengerejista enggau Penyambung Opis Pelajar Nengeri Sarawak (JPNS), nyentuk ke pukul 3 lemai kena 2 Jan tu tadi bisi 13 buah sekula di serata Nengeri Sarawak ditutup ketegal ampuh bah.
Sekula nya iya nya Sekolah Kebangsaan (SK) Kampung Tagageng (Subis), SK Kampung Nyalau (Bintulu), SK Sungai Menyan, SK Ulu Sungai Sengan, SK Nanga Assan, SK Jalan Deshon enggau SK Nanga Bon, kesemuanya di Sibu.
Mega ditutup iya nya SK Kampung Klid/Plajau (Dalat), Sekolah Jenis Kebangsaan Cina (SJKC) Khung Cheng (Meradong), SK Metalun (Belaga) sereta SK Saint Mark, SK Nanga Selangau enggau SK Kuala Lemai di Selangau.
Ba pengerami ke sama, Fatimah mega nyerahka bantu barang pemakai, kereban dapur, duit kuchik enggau ramu ngagai dua buah ruang bilik ke ditunutung penusah angus ari Rumah Sigah, Sungai Baoh Burak, Dalat.
Penusah angus nya nyadi kena 19 Disember taun nyin tadi, urung pukul 7.15 malam.
Kelimpah ari nya, Fatimah mega nyuaka geran Projek Mit Menua Pesisir (MRP) sepenyampau RM15,000 ngagai Rumah George Egun ngambika bisi dikena meli injin sangkut enggau perau.
Sama bisi datai ba pengerami nya Residen Mukah Mohamad Supiah Hamdan, Pemesai Opis Pelilih Mit Mukah Shafrie Saili sereta sida ke bukai.