Anda di sini

Musin tengkujuh ukai semina ngeruga penatai pemisi orang berikan tang mega orang tengah

Advertisement

DIKERUGA TENGKUJUH: Kapal orang berikan dipeda ditambat ba jeti Kampung Goebilt.

KUCHING: Musin tengkujuh ke benung ditapi kitai diatu ukai semina diasai orang berikan di tasik, tang mega mangka orang tengah ke nyadi pemeli ari orang berikan.

Tinjau Utusan Borneo di jeti orang berikan Kampung Goebillt besemak enggau mengeri Kuching kemari mandangka dagang ikan udah jauh nurun.

Seiku orang tengah ke dikerandau, Mohd Syahrul Shahari,30, madah dalam timpuh dua  minggu ke udah asil ari dagang ikan sida sebilik (Syarikat Pemborong Lapuk) enda bangat tentu manah ketegal gaya hari ti enda tentu.

“Dua minggu sebedau kitai mungkal taun baru, orang berikan sigi enda ulih nurun ke tasik. Gaya hari balat jai ke alai alun umbak ba tasik balat tinggi.

“Berindik ari nya, kami nadai nerima bekal ikan ti deka dijual ngagai pemurung ari pasar. Enti suba asil bejual manggai ngelui ari RM2,000 ninting hari tang diatu ke semina RM800 aja,”ku iya seraya madah penusah nya disadang diasai nyentukka bulan Mach tu ila.

Iya ti nyadi orang tengah ungkup 10 buah kapal berikan ari Pusa, Sri Aman madah, penatai pemisi sida (orang berikan) mega balat nyusut ari ke suah.

“Enti maya hari manah sida ulih teulihka asil urung RM700 ngagai RM800 sekali nurun ke tasik tang diatu engka semina RM250 aja.

“Baru seminggu tu sida bisi nurun ke tasik, nya pan baru dua kali aja. Ejensi penerit adat seruran matau pejalai sida ke alai sida ditagang berikan enti gaya hari enda manah,” ku iya.

Ketegal nya mega, kitai ulih meda bekal ikan ba pasar ikan serata Kuching balat kurang, tandu iya.

Entara sekeda ikan ke suah dibeli Syahrul ari orang berikan iya nya ikan pari, tongkol, kembung, gelama, tenggiri, siakap sereta mayuh macham undang.

Syahrul mega madah iya enda sengapa nikika rega ikan ke dijual ngagai pemurung taja pan bekal kurang.

Iya madah enti rega ikan di pasar bisi niki, rega nya ditiki pemurung lalu ukai ketegal dulu ditiki ka iya.

Dua iku orang berikan ari Beladin, Pusa Mohd Yunus, 20, enggau Zulhelmi, 17, ke dikerandau ba atas kapal berikan madah sida udah lama enda nurun ke tasik.

Ku Mohd Yunus, kapal kami semina ditambatka ba jeti Kampung Goebilt ditu aja nganti gaya hari belinsur manah.

“Seraya ke nganti gaya hari manah, kami semina ngemanah perengka berikan baka ke nyait pukat ti udah pesuk enggau pengawa bukai.

“Nadai mih asil diulih maya ke diatu, ejensi penerit adat tasik mega nagang kami nurun ke tasik berikan,”ku iya.

Tinjau kemari mega mandangka mayuh kapal orang berikan ditambatka ba enda kurang ari empat jeti di Kampung Goebilt.

Kampung Goebilt udah nyadi sebuah genturung pendiau orang berikan kenyau ari kelia menya ke alai tebal agi pemurung tauka tuke datai meli ikan ke baru datai ari tasik ngambika tau dijual ba mayuh pasar ikan ngelingi Kuching.

Advertisement