KUCHING: Sarawak merambu ngepunka penerbai bilun terus ngagai Shenzhen, China ngambika tau nyaup ngeranchak atur dagang temuai entara kededua menua.
Menteri Dagang Temuai, Datuk Amar Abang Johari Tun Abang Openg madah, perambu nya udah dikenatai ngagai Konsulat Besai China di Kuching ke alai iya deka ngatur kerejasama enggau Malaysia Airlines ngemujur juluk nya.
“Kaul diplomatik entara Malaysia enggau China udah diadu manah pengelama 40 taun ke udah lalu udah mega ngatur macham pengawa rama enggau ekonomi ungkup pemaik kededua menua kelebih agi Sarawak.
”Ari sukut dagang temuai, aku nguji deka matak mayuh agi orang ari China nemuai ke Sarawak ba taun 2014 nengah chara ngepunka penerebai terus ari palan dagang temuai di menua China baka ke Shenzhen sereta ke bukai ke Kuching,” ku iya.
Iya mansutka jaku nya ba pengawa Makai Lemai Gerempung Dagang Eksport-Import Kuching China di Christian Ecumenical Center ditu,malam ensanus.
Pengerami nya digulu Tuai Pemegai Menua, Tun Datuk Patinggi Abang Muhammad Salahuddin sereta bini iya Toh Puan Datuk Patinggi Norkiah, Penyanding Penemu Gerempung Tan Sri Datuk Yee Ming Seng, Presiden Gerempung Xii Ming Tang, Konsul Besai China di Kuching Liu Quan enggau orang bukai.
Ku Abang Johari nambah, perintah nengeri betuaika Kepala Menteri Pehin Sri Abdul Taib Mahmud angkun nentuka pemansang ke sama bela diasai semua bansa nyengkaum komuniti Cina.
Nengah polisi ti ditukuka Kepala Menteri sereta Menteri Besai Datuk Seri Mohd Najib Tun Razak, iya pechaya Sarawak deka ngasai sekeda penguntung ari dagang ke disetuju Presiden Republik Rakyat China enggau Malaysia.
“Kaul entara Malaysia enggau China bepun kenyau ari jeman Laksamana Cheng Ho lalu majak rat asil ari penemuai kededua ketuai ngelama ke udah ke alai bedau lama tu tadi Malaysia bisi nerima penemuai Presiden Republik Rakyat China.
“Maya Najib dipilih nyadi Menteri Besai, China nyadi menua ti keterubah digusung iya lalu nya mandangka kededua menua ngembuan kaul ti chukup rat,”ku iya.
Tambah Abang Johari, China udah diakun nyadi sebengkah menua ti ngembuan kuasa ekonomi ti besai nangkanka Amerika Syarikat lalu disadang ulih ngalahka Amerika Syarikat jemah.
Berindik enggau nya, kaul entara China enggau Malaysia sigi nyadi pekara lumur satu ketegal menua nya benung majak mansang maya ke diatu.