KUCHING: Kaban Kunsil Nengeri (ADUN) Kedup Martin Ben netapka inisiatif Impian Sarawak ti dituku penyakal, Parti Tindakan Demokratik (DAP) ngembuan juluk matak mensia mayuh ngalih lalu meri sukung ngagai sida.
Ku iya, pengawa ngelanchar semilan projek nengah inisiatif nya ungkup suku keterubah taun 2014 tebal agi mandangka juluk politik penyakal ti deka ngerampas kandang menua pesisir.
Semilan projek ti udah diputuska DAP nya nyengkaum penuduk sitak DUN Kedup ke nyadi kubu kuat Barisan Nasional (BN).
Lebuh dipinta ngenang senentang pekara nya kemari, Martin madah ke diri enda tekenyit Kedup dirintai dalam semilan projek Impian Sarawak DAP.
“Projek ke deka diadu DAP nya ukai pekara baru ungkup peranak di Kedup ke alai tebal agi genturung pendiau diatu udah nerima bekal ai beresi.
“Taja pia, bisi sekeda kandang endur mengkang bedau nerima bekal ai beresi tang semua nya deka diadu perintah BN bererenggat.
“Aku ke ngarika peranak Kedup nadai kuasa nagang DAP bejalaika projek ke diperambu nyengkaum pengawa masang sistem paip ai graviti ditu,”ku iya.
Ku Martin nandu, Menteri Pemansang Infrastruktur enggau Penyambung Dato Sri Michael Manyin udah bejadi Palan Pemeresi Ai Slabi di Serian ke beungkus RM116.5 juta ba bulan Disember tu tadi.
“Nengah palan nya, semua peranak Serian disadang deka nerima bekal ai beresi dalam timpuh 10 taun ke deka datai.
“Palan pemeresi nya chukup mekal ai ngagai genturung pendiau di Serian tang ketegal ti baru berengkah operasyen, kitai begunaka sekeda awak dikena nentuka semua rayat nerima bekal ai tu,”ku iya.
Palan Pemeresi Ai Slabi tembu digaga kena 7 April 2013 lalu ulih mekal 50 juta liter ai sehari nambahka penyampau palan lama ti ulih mekal 25 juta ai sehari.