BISI JULUK ATI: TR Lidwina (kanan) enggau TR Peter.
SIBU: Tuai Rumah ke baru dipadu Peter Tinggom Santat enggau Lidwina Mathew bekunsika juluk ati deka mai pemansang ngagai rumah panjai pegai seduai.
Lidwina, 44, indai empat iku anak, orang indu keterubah ari menua Tutus mangku pengawa nya seraya Peter, beumur 54 taun kala gawa nyadi sedadu, ketuai rumah pengabis panjai ba menua Bawang Assan.
Seduai antara sekeda ari 47 iku Tuai Rumah ari bagi menua Sibu enggau Sarikei nerima surat chiri nyadi Tuai Rumah ari Menteri Penguasa Kandang Menua enggau Pemansang Raban Bansa Dato Sri Wong Soon Koh ba sebengkah pengerami ke diatur ba Opis Residen Sibu, apin lama ke udah.
“Aku besemaya deka mai pemansang perengkaguna baka bekal ai beresi enggau kuasa karan kelimpah jalai alun ngagai 20 pintu bilik pegai aku.
“Kami chukup lama nganti perengkaguna nya ngambika sama ulih ngasai penyenang baka peranak rumah panjai bukai,” ku iya.
Lidwina dipadu nyadi Tuai Rumah nganti tuai rumah lama ketegal udah nadai.
Peter madah, iya deka ngemeratka ba tiga pekara baka pemansang rama, nyungkakka tikas penatai pemisi enggau pelajar nembiak.
Rumah panjai 67 pintu bilik pegai iya udah bisi perengkagun.
Peter nganti Tuai Rumah Baseh ke ningkilka diri mangku pengawa nya ketegal udah tuai umur.