Anda di sini

Semina tiga aja palan pengenduh sementara dibuka kemari

Advertisement

KUCHING: Naka pukul 4 lemai kemari semina tiga aja palan pengenduh sementara dibuka ngagai orang ti kena penusah tasah bah di nengeri tu.

Tiga palan pengenduh nya nyengkaum Dewan Sukan KPSU, Tatau; SK Kpg Iran di pepilih menua mit Niah enggau Dewan Masyarakat Bakong, Marudi.

Bepelasarka Statistik Penusah Tasah Bah ti dipansutka nengah opis penerang ti diriputka naka pukul 4 lemai kemari, sepenyampau 10,217 iku orang ti mungkur 1,355 ruang bilik diriputka mengkang kena penusah tasah bah.

Ari penyampau 10,217 iku orang ti mungkur 1,355 ruang bilik nya semina bisi 321 iku orang ti mungkur 83 ruang bilik dipindahka ngagai palan pengenduh sementara.

Bisi 108 iku orang ti mungkur 31 ruang bilik dipindah ngagai Dewan Suarah KPSU Tatau, Bintulu ti nyengkaum ari Kpg Dagang, Tatau (18 ruang bilik / 71 iku orang); Kpg Seberang Pasar, Tatau (tujuh ruang bilik / 21 iku orang); Kpg Baru, Tatau (dua ruang bilik / lapan iku orang); Kpg Hulu Tatau (dua ruang bilik / empat iku); Kpg Seberang, Kpg Baru (dua ruang bilik / empat iku orang).

Penyampau ti dipindahka ngagai palan pengenduh sementara SK Kpg Sg Iran iya nya bisi 75 iku orang ti mungkur 21 ruang bilik ari Kpg Sg Iran, Suai.

Nambahka nya penyampau orang ke dipindah ngagai palan pengenduh sementara Dewan Masyarakat Bakong, Marudi, Miri iya nya 138 iku orang ti mungkur 31 ruang bilik ari Kawasan Setinggan, Bakong.

Bepelasarka riput ti dibantaika Opis Pengemata Gaya Hari Malaysia Pampang Sarawak naka pukul 4 lemai kemari, Imej radar pukul 3.30 lemai enggau imej satelit pukul 3 lemai kemari nunjukka beberapa tumpuk remang ujan di mayuh endur di bagi menua di Sarawak.

Ujan enggau ribut petir diriputka nyadi ba sekeda endur di bagi menua Limbang, Miri, Bintulu, Mukah enggau Sibu kemari.

Lalu ujan tauka ribut petir nya ba seiti dua bagi menua Kuching enggau Samarahan kemari.

Berindik ari nya, MET Malaysia kemari nesau madahka ribut balat enggau bah ngenyit  dipelabaka deka nyadi sekeda endur.

Nengeri tu dipelabaka agi mambam beberapa hari ke deka datai ba sekeda bagi menua di kandang menua pesisir muakka lemai nyentuk malam sereta di kandang endur nebing ai muakka pagi.

Advertisement