KAPIT: Ketuai raban bansa Iban bagi menua Kapit Temenggung Datuk Kenneth Kanyan ngansak mensia mayuh bediri tegut ba belakang Kepala Menteri (KM) Pehin Sri Abdul Taib Mahmud.
Kanyan madah, rayat Sarawak agi begunaka pegai Taib mai pemansang ngagai menua tu.
“Sekumbang Taib nyadi KM, iya udah mujur mai pemansang ngagai nengeri tu berengkah ari atur keterubah pemansang ekonomi lalu diatu masuk ba renggat kedua iya nya nengah SCORE ari Tanjung Manis nyentuk ke Miri.
“Ngemeratka industri Hub Halal ba Tanjung Manis enggau industri berat ba Palan Industri Samalaju Bintulu deka nyungkakka penatai pemisi tinggi menua,” ku iya madah ngagai The Borneo Post, bedau lama ke udah.
“Maya diatu, ukai awak ke engkeman ngasuh Taib nyurutka diri laban perintah menua benung ba atur pemansang renggat kedua ti ngemeratka pemansang industri. Aktiviti ekonomi nengeri berengkah ari pengawa betanam betupi lalu diatu nyau nyingkang ngagai industri berat.
“Tu meh pemujur ke udah dibai Taib, ke nyadi tukang ngatur pemansang. Nya alai, Taib patut majakka perambu pemansang ke udah digaga ke penguntung rayat jemah,” ku iya.
Kanyan madah, Taib udah megai Sarawak enggau chukup manah sereta teratur ba pekara ekonomi, rama enggau politik, nyungkakka penatai pemisi nengah ngadaka peluang gawa ke mayuh.
Ba pekara politik, Taib udah nyerakupka semua pupu raban bansa ba baruh pegai gempung perintah Barisan Nasional (BN).
“Enti nadai ketuai ke landik baka iya (Taib), menua Sarawak enda ulih mansang sereta enda tejapai ke sebarang juluk kelebih agi dalam timpuh ke pandak,” ku iya.