Anda di sini

Projek Impian Sarawak nerima sambut

Advertisement

KABAN BARU: Mordi (tengah) nyuaka peminta pengerejista kaban baru ari DAP Pampang Tasik Biru ngagai Chong (kiba) ba indu opis parti ensana.

KUCHING: Projek Impian Sarawak ti dipenyadika Parti Tindakan Demokratik (DAP) dua bulan ke udah nerima sambut ti manah ari rayat Sarawak nyengkaum di kandang menua pesisir.

Nya berindik ari lebih 100 iku kaban baru ari sitak Tasik Biru nyereta projek nya ti ngembuan juluk mantu rayat nyendiaka perengkaguna mensia mayuh baka jalai, bekal ai enggau elekterik ngagai rayat.

Nengah perengkaguna mensia mayuh nya, peranak genturung pendiau ulih mekuh ngagai projek pemansang ekonomi baka pengawa dagang mit ngambika teulihka penatai pemisi ti lebih tegap.

“Tu pemungkal ti manah ngagai DAP di baruh Projek Impian Sarawak beduduk ari lebih ari 100 iku pesereta baru ari sitak Tasik Biru.

“Aku arap bendar projek tu ulih tejapaika juluk lalu kami deka gawa enggau chakah agi ngambika ulih ngerembus sereta semak agi enggau mayuh agi kandang menua ti begunaka bantu kelebih agi perengkaguna mensia mayuh,” ku Chong Chieng Jen ti nyadi Chairman DAP Sarawak ba aum pengarang berita di Indu Opis DAP ditu, kemari (ensana).

Ba aum pengarang berita nya mega Chong ti nyadi Kaban Parlimen Bandar Kuching bisi nerima peminta pengerejista 100 iku kaban baru ba projek nya ti disuaka pemantu khas iya, Mordi Bimol.

Nambahka nya iya ti mega nyadi Kaban Kunsil Nengeri (ADUN) Kota Sentosa mega bejadika isu kedua buletin The Rocket Ubah Sarawak dalam Jaku Melayu enggau Jaku Iban.

Bekaul enggau pekara bukai, Chong ngelalau rayat nengeri tu kelebih agi raban orang Keristin ngambika liat ati sereta enda tekeruga enggau bantah UMNO Selangor pasal jaku Allah dalam ‘The Herald’.

Taja pia ku Chong, nya ukai reti rayat kelebih agi raban orang Keristin ngelakka piak UMNO sepeneka ati sereta tejapaika juluk sida empu.

“Ba penemu aku isu ti sengaja dimainka sida UMBO di baruh Barisan Nasional (BN) dikena narit ati rayat ti ngelaban polisi sida.

“Nama kebuah Menteri Besai Datuk Seri Mohd Najib Tun Razak lalu enda bebunyi pasal isu tu? Enda ke iya nemu iya ti enda bebunyi nya semina meri ruang ngagai UMNO neruska agenda sida?.

“Najib enda patut terus diau, iya patut beratka isu tu sereta nerangka ngagai rayat pasal isu tu,” ku iya.

Advertisement