DIKERANDAU: Dr. Wan Junaidi benung dikerandau pengarang berita, seraya disempulang Dr. Abdul Rahman. — Gambar Jeffery Mostapa
KUCHING: Pengelubah atur pengawa ari piak Kedutaan menua tasik ngenyanggalka penyampat perintah Malaysia ti deka nganjung enda kurang 300,000 iku orang ti tama nadai pemendar (PATI) pulai baru ngagai menua asal sida empu.
Sapit Menteri Dalam Nengeri, Datuk Dr. Wan Junaidi Tuanku Jaafar madah, orang ti tama nadai pemendar nya ke Malaysia tebal agi ari menua Myanmar, Filipina enggau Indonesia.
Sebedau tu kitai kala udah nganjung urung 600,000 iku PATI pulai ngagai menua sida empu, ngambika enti sema datai baru ke Malaysia sida ngena dokumen ti sah sereta nengah jalai ti betul, ku iya.
“Kitai udah berunding enggau piak Kedutaan Myanmar, Filipina, Indonesia enggau ke bukai pasal deka nganjung pulai baru PATI ngagai menua asal, tang proses sida kelalu lubah.
“Perintah Malaysia amat chakah sereta deka beguai nganjung PATI pulai ngagai menua asal sida, PATI tu ngenusahka kitai laban ninting hari kitai meri pemakai, pengelantang sereta nyaga pengerai sida.
“Seingat aku enda kurang ari 300,000 iku PATI agi dalam menua kitai ke nadai dokumen sereta ditan di ba DEPO serata menua. Tu nating belanja perintah Malaysia, laban ungkus seiku PATI enda kurang ari RM75 sehari.
“Kitai nadai mekanisma nganjung sida PATI pulai ngagai menua sida kelimpah ari dokumen nya ulih disediaka piak menua sida empu,” ku iya ti nyadi Kaban Parlimen Santubong mansutka pekara nya lebuh dikerandau pengarang berita pengudah tembu pengerami nyuaka cek Bantuan Kecemasan ti diatur ba sebengkah hotel ditu, pagi kemari.
Nandu baru iya madahka pemadu mayuh raban PATI di menua Malaysia iya nya raban bansa Myanmar.
Ku iya, sekeda PATI mega meri dokumen ngagai orang ti dikedeka aja ti ngujungka proses nganjung pulai baru lubah.
Kelimpah ari nya, iya madahka pemayuh PATI tauka rayat ari menua tasik ke datai ke Malaysia beduduk ari pemayuh peluang ti bisi disediaka di nengeri tu nyangkaum ba ladang, nyadi kereja kontrak sereta kebukai ti enggai dikereja peranak menua tu empu.
“Rayat Malaysia tebal agi ngiga kereja ti enda berat duduk dalam bilik chelap, nya ngujungka pengawa berat diisi rayat menua tasik, nyengkaum PATI,” ku iya.
Bisi datai ba pengerami nya kemari, Kaban Kunsil Nengeri (ADUN) Pantai Damai Dr. Abdul Rahman Junaidi sereta Datin Feona Junaidi.