MIRI: Sekreteri Politik Kepala Menteri, Richard Wil Uban bisi meda pemanah ba pengawa numbuhka Heritage Kindergarten, ari baruh program UNESCO.
Richard Wil ke mega chairman Parti Rayat Sarawak (PRS) Pampang Senadin, lebuh ti bejadika Heritage Kindergarten ti keterubah endar di Miri kena Hari Tiga tu tadi, ngelalau bala apai indai sentang pemesai guna pelajar tumu ngagai bala nembiak sebedau sida tama ngagai sekula primari.
“Kelimpah ari belajar sentang jaku, macha enggau ngira, bala nembiak nya mega diajar pekara bukai baka berakup sereta meretika pangan diri ke bebida batang pengarap enggau penatai,” pia ku Richard Wil.
“Tebal agi bala nembiak jampat agi nangkap utai ke dipelajar enti sida udah masuk ngagai sekula primari, laban sida udah belajar ba tadika. Chara sida begulai enggau nembiak bukai pan deka manah agi,” pia ku iya.
Tadika ke dibuka ba Desa Indah 2, di Pasar Baru Permyjaya ditu dipejalaika melaki bini, Egi Bangan enggau Rosebea Walter Etta.
Program tu udah ditengkebang UNESCO ari baruh Institute of Linguistic. Program nya deka ngemeratka pelajar ba linguistik bepelasarka jaku diri empu enggau sekeda jaku bukai.
Tadika nya deka ngemeratka jaku Iban kelimpah ari jaku English enggau Bahasa Malaysia.
Lebuh ke muji pengawa numbuhka Heritage Kindergarten nya, iya madahka nembiak rebak baru patut nemu jaku bukai baka English, Bahasa Malaysia tauka Melayu enggau China, tang anang enda nemu jaku sida empu.
“Berasai sinu endar ati enti pekara ke baka nyadi ngagai jaku diri empu laban nya sebagi ari pengelala, adat enggau pesaka sida. PRS nya sebengkah parti bansa asal ke tebal agi ngembuan bansa Iban enggau Dayak. Nya alai aku meransang bala apai indai nganjung anak sida belajar ba Heritage Kindergarten sereta ngenegapka tadika nya ba palan ke tebal agi diuan komuniti kitai,” ku iya.
Taja pan nya dipejalaika ari baruh program UNESCO, Richard Wil madah ngagai apai indai, program pelajar enggau utai ke dipelajarka sida nya sebaka enggau Setindit Kurikulum Pra-sekula Nasional.
Kelimpah ari belajarka jaku diri, tadika nya mega bisi ngajar sentang ajar ba batang pengarap sereta ngajar sentang pelajar ba Bup injil ngagai bala nembiak.