MONG
Kena ngemujurka semua program parti, napi PRN ti deka datai
SRI AMAN: Semua kaban Parti Rayat Sarawak (PRS) ba renggat baruh patut ngerapatka kaul kerejasama antara sida kena napi Pengawa Bepilih Nengeri (PRN) ti deka datai, ku Kaban Kunsil Nengeri (ADUN) Bukit Begunan Datuk Mong Dagang.
“Kaul kerejasama rapat tu beguna bendar ngagai semua kaban PRS kelebih agi ba renggat baruh dikena ngemujurka macham program kelimpah nyadung polisi perintah Barisan Nasional ngagai rayat,” ku iya.
Berindik ari nya, iya mega minta semua kaban PRS kelebih agi ba DUN Bukit Begunan ngetanka penyerakup kena napi PRN ti deka datai.
Berebak enggau nya, Mong ke mega Menteri Muda Betanam Betupi (Pemansang enggau Dagang), beterima kasih ngagai bala kaban PRS ke udah gawa bebendar maya Pengawa Bepilih Besai Parlimen Ke-13 (PRU13) tu tadi.
Ba pengerami nya mega, Mong bisi nyuaka Projek Mit Menua Pesisir (MRP) sepenyampau RM13,000 ari perintah Barisan Nasional (BN) ngagai tiga bengkah gerempung dalam pelilih Sri Aman.
Gerempung Apai Indai enggau Pengajar (PIBG) Sekolah Kebangsaan (SK) Temudok nerima chek sepenyampau RM3,000 seraya Gerempung Adat enggau Main Asal Iban Sri Aman enggau Kelab Indu Opis Polis Pelilih Sri Aman sama nerima RM5,000.
Mong nyuaka chek MRP ngagai penerima ba rumah Tukang Wang Pemuda Parti Rayat Sarawak (PRS) Bukit Begunan, Frederick Isau.
Ba jaku ngelansa iya, Mong ngarapka semua penerima MRP nguna bantu ari BN nya enggau manah.
“Guna meh agih tu enggau manah ngambika ulih mai penguntung ngagai gerempung tauka serakup kita,” ku iya.