KEPENGINGAT: Dr. Wan Junaidi (tengah) sereta Kaban Kunsi Nengeri (ADUN) Pantai Damai Dr. Abdul Rahman Junaidi (dua kiba) begambar bebala mayuh enggau penerima bantu ba pengerami nyuaka cek Bantuan Kecemasan Ahli Parlimen Santubong. — Gambar Jeffery Mostapa
KUCHING: Perintah merambu deka mansik sereta nyendiaka sebengkah modul ti bebida ba atur pengawa ngambi orang nyadi kaban Ikatan Relawan Rakyat Malaysia (RELA).
Sapit Menteri Dalam Nengeri, Datuk Dr. Wan Junaidi Tuanku Jaafar madah, nya dikena ngenukuka rikut pemanah ulah seseiku orang ti deka minta nyadi kaban RELA.
Iya madah seseiku orang ti nyadi kaban RELA patut ngembuan ulah enggau ati ti nadai bechiping maya bejalaika pengawa.
“Udah tu ila bepelasarka nama pekara ti kala nyadi, kitai dipelabaka deka bisi modul baru ti bebida, kitai deka mansik dulu ba atur pengawa ngambi orang nyadi kaban RELA.
“Dipelabaka kitai deka ngubah chara nerima raban tu jemah ila, kitai deka berandau sereta berunding dulu enggau opis menteri.
“Sebedau diambi nyadi kaban RELA kitai engka patut nyarap tauka napis dulu orang ke minta nyadi RELA, laban kitai deka ngenukuka endur ke dijaga piak RELA amat likun sereta nadai nyadi pekara baka ‘pagar makai padi’,” ku iya lebuh dikerandau pengarang berita ba sebengkah pengerami ditu, kemari.
Iya ngarapka orang mayuh ti deka nyadi sereta diberi peluang nyadi kaban RELA nadai bechiping ati enggau runding.
Kelimpah ari nya lebuh ditanya bekaul enggau rumah iya ti diuji dirumpak, Dr. Wan Junaidi madah, tiga iku ti dipelabaka ngereja penyalah nya udah ditangkap sereta benung dipansik polis.
“Baka ke dipadah ngagai aku kemari (ensanus), tiga iku orang ti dipelabaka ngereja ulah nya udah ditangkap, direman sereta benung ditasat polis.
“Dua ari tiga iku ke ditangkap nya kaban RELA. Pekara tu kitai serah aja ngagai polis,” ku iya seraya muji penyikar polis ti ulih nangkap orang ti dipelaba nguji deka ngerumpak rumah iya.
Dulu ari nya, Dr. Wan Junaidi nyuaka bantu belanja sepenyampau RM76,680 ti nyengkaum ngagai 23 iku nembiak enggau penyampau RM13,300 ti nampung pelajar ngagai universiti enggau kolej; 11 iku orang (RM8,940) ti nerima bantu perubat penyakit kronik; tiga iku (RM3,700) nerima bantu penasah sereta 21 gerempung ukai dikuasa perintah (NGO) ti nerima MRP Pantai Damai enggau Demak Laut sepenyampau RM50,740.