SRI AMAN: Bala ketuai raban bansa kelebih agi bala tuai rumah di pelilih mit tu diperansang ngiring bala nembiak redak sida ngambika terus nyukung perintah, pia ku Kaban Parlimen Sri Aman, Masir Kujat.
Ku iya, ketuai raban bansa kelebih agi bala tuai rumah endang ngembuan tanggungpengawa ke besai ngiring nembiak redak sida ngambika nyukung perintah, ukai ngerachun runding sida ngambi begedika perintah.
“Kita ke nyadi tuai rumah endang orang ke pemadu semak enggau bala nembiak redak ba menua kita, nya alai kita meh ke nyadi pengari rayat ba kandang menua ke ari baruh pegai kita.
Iya bejaku munyi tu ba Pengerami Makai Lemai ke diatur ba Chapel Saint Martin, Lachau di Pasar Lachau ditu bedau lama ke udah.
Ku iya, perintah BN udah lama megai menua tu. Nya alai mayuh endar pemansang udah digaga perintah Barisan Nasional.
“Nadai kebuah rayat ngenggaika pemansang ari perintah BN ti betuaika Menteri Besai, Datuk Seri Mohd Najib Tun Razak ba perintah besai enggau Pehin Sri Abdul Taib Mahmud di Sarawak ke udah mujur ngemansangka menua tu.
“Sesapa ke kala nyukung penyakal sebedau tu patut mulaika diri ngagai Barisan Nasional (BN) laban perintah BN meh ke pemadu manah sereta seruran di ati rayat,” ku iya.
Ku Masir baru, semua pemansang ke dipeda kitai diatu, semua nya datai ari perintah Barisan Nasional (BN), ukai pemansang ari penyakal.
Kelimpah ari nya, mayuh mega tanah udah dikemansangka ba Sri Aman nyengkaum endur betanam sawit, getah sereta mayuh macham agi.
“Nengah projek pemansang tanah nya, kami arap endar ati nya ulih meri penguntung ngagai rayat di menua pesisir ari segi nyungkak tikas ekonomi sida,” ku iya.
Sama bisi ngulu pengerami nya, Pemantu iya empu, Edmund Pirang enggau bala ketuai raban bansa bukai.
Beserimbai enggau nya, iya udah ngungkupka belanja RM5,000 ngagai komiti chapel nya ungkup tahun 2014 ngambika bisi dikena sida bejalaika pengawa sepemanjai taun sida.