Anda di sini

12 buah sekula di Sarawak ditutup

Advertisement

KUCHING: Bisi 12 buah sekula di nengeri tu ditutup kena 3 Januari (ensana) ti mungkur 1,347 iku nembiak, ketegal sekula ampuh bah enggau putus penyambung ngagai sekula.

Nitihka ‘Laporan Pengoperasian Sekolah Yang Dilanda Banjir Atau Jalan Ke Sekolah Terputus Akibat Banjir’ naka pukul 10 pagi ensana (3 Jan), bisi empat buah sekula primari ti baru ditutup kemari (ensana) lalu lapan sekula ke bukai endang udah ditutup kena 2 Januari.

Empat buah sekula ti baru diriputka ditutup iya nya SK Nanga Tajam, Selangau ti bisi 104 iku nembiak; SK Nanga Nirok (54 iku nembiak); SK Nanga Serau, Julau (75 iku nembiak) enggau SK Pangtray, Daro bisi 153 iku nembiak.

Empat buah sekula ti tejanggal ba pelajar nya berindik ari tikas peninggi ai ba kandang sekula majak niki, putus penyambung enggau piak sekula meresi kandang sekula sereta ngatur reta tengkira ti rusak.

Sekula ti berengkah ditutup kilah ensanus (2 Januari) sereta mengkang ditutup nyentuk ke 3 Jan iya nya SK Kg Tegageng ti bisi 103 iku nembiak; SK Kpg KLID/Plajau, Dalat (89 iku nembiak); SK St Mark (M), Selangau (62 iku nembiak); SK Nanga Selangau, Selangau (305 iku nembiak); SK Kuala Lemai, Selangau (44 iku nembiak); SK Jalan Deshon, Sibu (275 iku nembiak) SK Nanga Bon, Sibu (83) enggau SK Metalun, Belaga.

“Naka pukul 10 pagi kemari (ensana), sekula SK Metalun, Belaga ditutup tang semua pengajar (enam iku) enggau nembiak (81 iku) sekula nya dipindah sereta bejalaika sesi ngajar enggau belajar ba SK Tegulang. Nya berindik ari kandang sekula nya ti agi ampuh bah,” ku penerang ari JPNS.

Kelimpah ari nya bepelasarka riput ti dikeluarka Opis Pengamata Gaya Hari Malaysia Pampang Sarawak pukul 8.30 pagi 3 Jan hujan kilah ensanus tebal agi nyadi di bagi menua Limbang enggau Miri taja pia muak pagi kemari (ensana) gaya hari ba endur nya majak manah.

Nengeri Sarawak dipelabaka agi mambam beberapa hari ke deka datai taja pia enda bangat baka sebedau tu.

Nitihku penerang  Opis Pengamata Gaya Hari Malaysia, opis nya deka seruran matau gaya hari sereta meri penerang ke pengelikun menua enggau rayat.

Kelimpah ari nya bepelasarka statistik penusah tasah bah ti dirikutka naka pukul 10 pagi ensana, bisi 1,505 ruang bilik ti mungkur 11,690 iku orang ari 11 bagi menua di nengeri tu.

Bisi lima palan pengenduh sementara dibuka naka pukul 10 pagi ensana iya nya Surau Kpg Rimba Padi, Serian, Kota Samarahan; Dewan Masyarakat Pakan, Pakan, Sarikei; Dewan Suarah Bintulu, Bintulu; Dewan Sukan KPSU Tatau, Bintulu; SK Kpg Iran, Miri; Dewan Suarah Marudi, Marudi, Miri enggau Dewan Masyakat Bakong, Marudi, Miri.

Taja pia, ari penyampau semua ti kena tasah ampuh bah nya semina 86 ruang bilik ti mungkur 347 iku orang ti dipindah ngagai palan pengenduh sementara.

Penyampau ke dipindah ngagai palan pengenduh sementara nya nyengkaum lapan ruang bilik (38 iku orang) ari Kpg Rimba Padi, Serian; tujuh ruang bilik (35 iku) ari Rh Jabang Nanga Wak, Pakan; 21 ruang bilik (75 iku) ari Kpg Iran; seiti ruang bilik (lima iku) ari Kpg Sungai Ridan, Marudi; 28 ruang bilik (129 iku orang) ari Kawasan Setinggan, Bakong, Marudi sereta 28 ruang bilik ti mungkur 100 iku orang ari Kpg Dagang, Kpg Seberang Pasar enggau Kpg Hulu Tatau.

Advertisement