NADAI CHARA BUKAI: Sekeda ruang bilik di Kampung Tabuan Dayak bekenaka baldi nimba ai ke masuk ke dalam rumah kena lemai Hari Tiga tu tadi.
Parit ti udu alit balat ngenataika penanggul ngagai sida kelebih agi maya musin pengujan
KUCHING: Peranak Kampung Tabuan Dayak minta Opis Penguasa Kandang Menua (PBT) ke bekaul ngemanahka sistem parit ngelingi genturung pendiau nya ke nyadi kebuah sida suah napi penusah bah ngenyit.
Sida nuduh Majlis Bandaraya Kuching Selatan (MBKS) enda bejalaika tanggungpengawa ti patut lalu ngujungka parit ba dalam kandang endur nya suah alit.
Ba penusah bah ngenyit ke nyadi kena lemai Hari Tiga (1 Januari 2014) tu tadi, Lurung 5, 10 enggau 10A Kampung Tabuan Dayak ke diuan enda kurang ari 100 ruang bilik napi penusah nya.
Taja pan ai udah surut pagi kemari (ensana), sekeda ruang bilik mengkang dipeda betimba ke ai ari dalam rumah lemai ensana.
Sekeda peranak ke enggai nama iya disebut madah kala ngenataika sebana ngagai MBKS kenyau ari taun 2010 tang nadai sebarang pengawa dipejalai kena mutar pekara nya.
“Kitai kala ngenataika pekara tu ngagai MBKS. Sida mega bisi datai meresa penusah ke ditapi kami tang naka ke diatu nadai sebarang atur udah diadu,” ku iya.
Pemesai MBKS lebuh dikerandau kemari madahka sida nadai daya nagang bah nyadi di genturung pendiau nya ketegal penusah nya nyadi ketegal ujan enggau ai pasang.
Sekretari John Lee madah sida sigi nyadang bah ngenyit deka nyadi ba kandang endur ke baruh tang semua nya ukai kuasa sida nagang.
Iya mega madahka MBKS udah ngemanah parit besai ba Kampung Tabuan Dayak ba taun 2011 lalu seruran diintu manah.
“Ketegal ujan ti kelalu bangat sereta penuduk genturung pendiau ba tanah ke baruh, bah ngenyit sigi dekanyadi,”ku iya lebuh dikerandau pemberita.
Lee mega madah sekeda raban MBKS bisi matau genturung pendiau nya maya penusah nyadi Hari Tiga tu tadi.
“Raban MBKS bisi datai ngagai genturung pendiau nya beambika gambar ke alai ai manggai ba peninggi sekaki setengah. Bah nya mega ngujungka jalai balat tetekul,”ku iya.