KUCHING: Opis Penguasa Kandang Menua (PBT) deka ngemeratka pengawa ngemanahka Sungai Tabuan kena mutarka penanggul ampuh bah ngenyit ke suah nyadi maya musin pengujan.
Menteri Opis Penguasa Kandang Menua enggau Pemansang Komuniti Dato Sri Wong Soon Koh madah, Majlis Bandaraya Kuching Selatan (MBKS) udah digerah beempu tanggungpengawa ngaga perambu mutarka penanggul Sungai Tabuan.
Iya madah, naka kediatu penanggul ampuh bah ke nuntung Kampung Tabuan Dayak tu tadi, baruh pegai Komiti Bantu Tasah Menua ke betuaika Sapit Kepala Menteri Datuk Patinggi Tan Sri Alfred Jabu.
Kena Hari Tiga tu tadi, lebuh pasang besai ke nyadi di nengeri tu, genturung pendiau bansa Dayak di Kampung Tabuan Dayak betapi enggau penanggul ampuh bah besereta enggau ujan lebat ari urung pukul 4 lemai ngagai 7 lemai.
Taja pia, ai surut urung pukul 8 malam tang sekeda rumah bisi dipasuk ai kelimpah ari mensia mayuh ke diau di genturung pendiau nya (ke bisi betapi enggau ai masuk ke dalam rumah) kiruh betimbaka ai sereta meresi kandang rumah sida.
Dalam kandang berapa taun tu ke udah, ninting bulan Disember (musin landas), Kampung Tabuan Dayak antara genturung pendiau ke seruran betapi enggau ampuh bah nyerumba enggau maya pasang besai nyadi.