KUCHING: Parti ke mayuh dipasuk raban bansa Dayak, baka Parti Rayat Sarawak (PRS) enggau Parti Progresif Demokratik Sarawak (SPDP), patut diberi tanda basa ketegal udah mantu gempung Barisan Nasional (BN) majak megai perintah di menua tu, ku Presiden PRS Tan Sri Datuk Amar Dr James Jemut Masing kemari (ensana).
Masing ti mega nyadi Menteri Pemansang Tanah sereta Kaban Kunsil Nengeri (ADUN) Baleh mantai pekara tu baru, berindik ari parti MCA betuaika Datuk Seri Liow Tiong Lai bisi minta dua penuduk menteri penuh enggau pengabis mimit dua penuduk sapit menteri diberi ngagai parti nya, lebuh kabinet ditusun baru enda lama agi.
Masing madah taja pan atur nyiri mangku pengawa kabinet nya ba baruh kuasa Menteri Besai ti mega nyadi Chairman BN Datuk Seri Najib Tun Razak, pengari dalam kabinet BN patut nitihka sukung tetiap parti ari penyampau pengari rayat tauka Kaban Parlimen.
“Lalu pekara ke sama nya mega patut dikena MCA enti sida iya narit pulai baru pemutus lalu merambu masuk baru dalam perintah BN,” ku iya.
“Taja pia, tetiap parti dalam gempung BN patut diberi ungkup ari sukut pengawa menteri nitihka pemayuh wakil rayat ke disukung ulih parti lalu ukai nitihka pemayuh kaban parti,” ku iya.
Taja pia, Masing madah, atur nyiri menteri nya endang hak Menteri Besai ke beratika penuduk 14 parti dalam gempung BN.
Pekara ke enda ngemuaska ati, iya nya PRS enggau SPDP teulihka 100 persin menang dalam Pengawa Bepilih Besai Parlimen (PRU13) tu tadi enti dibanding enggau MCA ke enda tentu mujur.
PRS menang ba semua enam kerusi parlimen alai sida iya bediri sereta SPDP menang semua empat kerusi endur bediri enti dibanding enggau MCA ke semina menang tujuh ari 39 kerusi ke alai sida iya bediri.
Presiden SPDP Tan Sri William Mawan Ikom enda ulih dikerandau bekaul enggau pekara nya.