KUCHING: Lima palan pemindah di serata nengeri mengkang bejalaika operasyen ungkup 350 iku mansa bah nyentukka jam 10 pagi kemari.
Kelelima palan iya nya Surau Kampung Rimba Padi di Kota Samarahan, Dewan Sukan KPSU Tatau di Bintulu, SK Kampung Iran di Miri enggau Dewan Suarah Marudi sereta Dewan Masyarakat Bakong di Marudi.
Semua palan tu nyadi palan pengenduh sentara ungkup 86 buah ruang bilik, nitihka statistik ti dikeluar Opis Pengemata Gaya Hari (Meteorologi).
Opis nya kala ngerijister penyampau 1,505 ruang bilik ti mungkur 11,690 mansa maya ai balat ngampuhka sekeda kandang endur bedau lama tu tadi.
Menua Mukah, Limbang enggau Kapit mengkang enda dituntung penusah bah nyentukka diatu.
Nitihka statistik, Miri ngerikut penyampau mansa bah pemadu mayuh iya nya 10,715 iku lalu ditangkanka Betong 354, Sarikei (230), Sri Aman (182), Bintulu (141), Kota Samarahan (38) sereta Sibu (30).
Opis mega mansutka penerang ke alai gaya hari mengkang ujan dalam kandang dua tiga hari tu tang disadang manah agi ari dua hari ke udah.
Ujan ke nyadi ba kandang menua Limbang enggau Miri kenaka malam Hari Empat udah ngetu.
“Opis Pengemata Gaya Hari deka seruran matau gaya hari lalu mansutka penerang tiap maya ungkup pengelikun semua,”ku penerang nya.